بلوچ یکجہتی کمیٹی تینا بیان ئٹی پارینے کہ پسنی نا ہند شادی کور نا ہندی سردل شیرخان ئے پاکستانی فوج 22 نومبر 2025 آ دزگیر کرسا بیگواہ کریسس۔ او شش توو اسکان زوراکی ئٹ بیگواہ مسونے ہرا وخت اونا خاہوت ئے ہچو سرپدی تننگ متنے۔
ترجمان نا رد ئٹ 30 مئی 2026 آ اونا خاہوت ئے حال تننگ مسونے کہ سردک شیر خان نا جون اسہ مُرءُ جنگل ئسیان دو تمانے۔ خاہوت نا پاننگءِ کہ منہ توو اسکان تینا چُنا نا انتظار آن پد ننے اونا جون دو تمانے۔ داسکان اونا بیگواہی نا سوب چاننگ متنے۔
بی وائی سی سردل شیر خان نا قتل ئے غیر قانونی پارینے و دا پارینے کہ بلوچستان ئٹی زوراکی ئٹ بیگواہی، غیر قانونی کوش و دروغ ئنا مونتس تا لڑ برجاءءِ۔
تنظیم خواست کرینے کہ سردل شیرخان نا بیگواہی و زندان ئٹی اونا خلنگ نا بابت ئٹ پٹ و پول کننگ مری و ذمہ وار تے قانون نا دد ئٹ جُست کننگ مرے۔
بی وائی سی بندغی حق آتا تنظیم آتیان خواست کرینے کہ اوفک بلوچستان ئٹی زوراکی ئٹ بیگواہی و غیر قانونی کوش آتا تدینی تیکن گامگیج ہرفر و خاہوت آتا توار آتے خف توریر و اوفتے انصاف ہیتر۔
