بی این ایم نا چیئرمین ڈاکٹر نسیم بلوچ سوراب ئٹی استو پاکستانی جیٹ آتا بمباری آ اوسوز نا درشانی کرسا پارینے کہ دا عکس آتیان ہندُن گمان مریک کہ دا غزہ و فلسطین نا چُناک ءُ ہراڑے بمباری آن چُنا، کماش و ایلو شاری تے جانی نسخان مسُنے ولے دا غزہ اف بلکن بلوچستان ءِ۔
ڈاکٹر نسیم بلوچ پارے کہ استو پاکستانی فوج سوراب ئٹی تینا جیٹ آتیئٹ بمباری کرسا 27 بندغ آتے شہید کرینے، خلنگ مروک آتیٹی بھلو کچ ئس چُناک خلنگانو۔ دا جلہو آن پد خلنگ و ٹپی مروک آ چُنا ، زالبول و کماش آتا عکس آک اُست ئے ہُسون کیرہ۔
او پارے کہ بلوچستان ئٹی دا پین جتا ءُ تدینی ئس اف بلکن بلوچ راج دہک آتیان زوراکی ئٹ بیگواہی، غیر قانودی قتل، لشکر کشی و زوراکی تیتون مون تننگ ءِ۔
ڈاکٹر نسیم بلوچ پارے کہ دا تدینی بلوچ نسل کشی نا بشخ ئسے و ہڑدے حالیت خراب مننگ ءِ و جہانی سطح آ زوت پام تِننگ خواہک۔
بی این ایم نا چیئرمین پارے کہ بلوچ راج ئنا ڈُکھ و ویل آک 1948 آن پد ہمو دے بناء مسُر کہ پاکستان بلوچستان ئے زوراکی ئٹ قوضہ کرے و ہمو زوراکیک اینو اسکان برجاء ءُ۔ جہان ہرا وڑ غزہ نا چُنا تیکن توار بُڑز کیک گُڑا بلوچستان نا چُناتا ہمو وڑ پام تننگ، اواری کننگ و رکھنگ نا ضرورت ءِ۔
