کیچ ءُ شال ئٹی پاکستانی لشکر چار بندغ ئے دزگیر کننگ آن گُڈ بیگواہ کرینے۔
حوال تا رِد ئٹ پاکستانی لشکر کیچ ئنا ہند بلیدہ کور پُشت ئٹی منصور ولد انور پنی ءُ ورنا ئسے 04 اگست نا نن 03:00 بجہ غا اونا اُراغان دزگیر کننگ آن گُڈ بیگواہ کرینے۔
اونا خاہوت نا پاننگ ءِ کہ منصور داکان مُست نومبر 2023 آ ہم زوراکی ئٹ بیگواہ کننگانے، ولے اِرا تو ئنا بیگوائی آن گُڈ 2024 آ آجو مسُنے ، دا اونا ارٹمی وار ءِ کہ زوراکی ئٹ بیگواہ کننگانے ۔
ایلو نیمہ غا شال ئنا ہند سریاب کسر آن ارا خوانندہ سفیع اللہ بلوچ ولد مہر اللہ ءُ مدثر بلوچ ولد شیر دل ئے 24 جولائی نا سوب ئنا 05:00 بجہ غا سی ٹی ڈی دزگیر کننگ آن گُڈ بیگواہ کرینے۔
ہندُن شال آن سی ٹی ڈی نجیب اللہ بلوچ ولد سرور ئے 07 جولائی نا نن ئنا 02:00 بجہ آ اونا اُراغان دزگیر کننگ آن گُڈ بیگواہ کرینے۔
