نوشتکار: ڈاکٹر اللہ نزر بلوچ
براہوئی مٹ: شئے رحمت بلوچ
ہراوخت کہ بندغ شعور نا بُڑزی ئے سر مریک، گُڑا او تینے ایسر کیک و چاگڑد نا بندغ آتے خوانِک۔ وخت ئس کہ کس شعور نا ردوم آن گدرینگک اوٹی راجی شعور ودی مریک، گُڑا تینا جند ئے ایسر کیک و راج ئکن تینا جان، مال و تینا خاہوت نا قربان کننگ آن ہم چک ءُ پد مفک۔
راج دوستی و وطن دوستی اسہ فطری عمل ئس ءِ، دا ہچ وڑ ئنا سیاسی و پین عوامل ئسینا آئری اف۔ یعنی جنگ آجوئی ٹی تینا زانت و چاننگ آن نو آبادکار نا زوراکی، ظلم و ثقافتی نسل کشی نا برخلاف تینا معروضی و موضوعی حالیت و عوامل تے مدنظر تخسہ اوفتے detonate کیک۔
ہرا وخت کہ جنگ تینا ارتقائی عمل آن گدرینگ ئٹی مریک تو قوضہ مروک سرڈغار نا الس تینا انقلابی جنگی مسخت آتیان واخُب مریک۔ تیبہ غا راج ذہنی وڑ ئٹ دا جنگ و انقلابی عمل ئے قبول کیک ہراٹی خاموش آ اکثریت ہم تینا بشخ ئے شاغِک۔ ولے دا وخت قوضہ گیر تاغت تون ہمو کُل گِڑاک مریرہ ہرافتے کہ آجوئی نا جنگ ئے سلِیفنگ کن کاریم ئٹ ہتسِہ قوضہ مروک ڈغار و راج آ زوراکی و ظلم کیک۔ ہندُن کہ پھل انگا بلوچستان ئٹی قوضہ گیر نوآبادکار کننگ ئٹی ءِ، بندغ آتا خاص وڑ ئٹ ورنا تا لس وڑ ئٹ خلنگ، ثقافتی زنک ایسری، زبان آ رکھ خلنگ ، ہندُن کہ داسہ نا بُتک آ حکومت بلوچستان یونیورسٹی ٹی بلوچی، براہوئی و پشتو نا وڑ انگا راجی زبان تیا رَکھ خلکُنے۔ دا دشمن نا آخری چال و خطرناک انگا چَم ءِ۔ دا دور ئٹی راج، خاص وڑ ئٹ ورنا تیٹی راجی جوزہ و شعور وخت ئس کہ ودھک تو اودے جہان نا ہچو تاغت ئس تونِنگ کپک۔
دا وخت آ دا ہیت انقلابی قیادت و تنظیم(آجوئی دوست) آتا حکمت عملی و منصوبہ بندی تیا منحصر ءِ کہ دا باشعور آ ورنا و لس بلوچ راج ئے امر جنگ ئٹی اوار کیک۔ داڑے ای انقلابی قیادت آن خواست کیوہ کہ تینا تنظیم دوستی و تنظیمی مفاد آن زیات راجی مفاد و جنزِ آجوئی نا خواست آتے مدنظر تخسہ فیصلہ کیر۔
دا جنگ ئٹی کُل آن بھلا سِلاہ نفسیاتی جنگ ءِ۔ ہرا وڑ کہ دشمن بلوچ جنگِ آجوئی ئے وخت ئس فرقہ واریت و وخت ئس زبانی جنگ پائِک ولے دنیا دشمن نا دا پروپیگنڈا ئے مسترد کرینے۔
بلوچستان ئٹی جنگ ئنا ترندی و اہداف آتا دوئی کننگ دشمن ئے نفسیاتی مریض جوڑ کرینے، قوضہ گیر لشکر(فوج) ئنا سپاہیک کیمپ آتیان نرّرِہ۔ بھاز آک تینے تینٹ خلیرہ۔ دا جنگِ آجوئی نا حقیقت و راستی ءِ۔
