بی ایل ایف نا جارکش میجر گہرام بلوچ میڈیا ٹی شنگ مروکو بیان ئسیٹی پارے کہ سرمچارک 26 فروری 2026 آ قیمتی آ خل و معدنیات دروکا ٹرک آتے وڈھ ئنا ہند وہیر ئٹی نشانہ کریر۔ جلہو نا وخت لاری تہ ٹائر آتے خلکُر و اسہ لاری سے تیبا ہُشار۔ دا کاروائی ہمو لڑ ئنا بشخءِ ہرانا رد ئٹ نن بلوچستان نا مڈی تہ دننگ ئے توننگ کن کننگ اُن۔
ترجمان گہرام بلوچ پارے کہ داکان مُست ہم کیہی وار قیمتی آ معدنیات آتے دروکا لاری تہ ٹائر آتے ترخیفسا ٹرک مالک و ڈرائیور آتے وارننگ تس اسُن کہ اوفک بلوچستان ئٹی برجاء انگا لٹ ءُ پل ئٹی پاکستانی فوج ئنا سہولت کاری آن مُر مریر ولے افسوس کہ منہ بندغ دا وارننگ ئے ہر وخت نظر انداز کننگءُ۔
ترجمان پارے کہ نن پاننگ خواہینہ کہ کس ئس ہم کوزہ گیر پاکستانی فوج ئنا بھلنی ٹی دا لُٹ و پل نا منصوبہ تہ بشخ مریک، اودے بلوچ راج ئنا دشمن چائنگءُ و اوڑتون ہچ وڑ ئنا رعایت مفرو۔
ترجمان مُستی پارے بلوچستان نا ہرا بشخ ئٹی ہم قیمتی معدنیات و خل کشوکا منصوبہ آک بلوچ راج ئنا معاشی قتل و مڈی تہ لٹ و پلءِ۔ داسا دا مخلوق نا برخلاف کاروائی تہ دائرہ پین بھلن و سخت کننگءُ، اوکان پد اوفک تینا ہر وڑ ئنا جانی و مالی نسخان زمہ وار تینٹ مرور۔ ننا مشن تینا راجی مڈی تہ رکھ و دا کسر ئٹ ہڑاند مروکا دشمن نا ہر بشخدارئے نشانہ کننگءِ۔
ترجمان گہرام بلوچ بیان نا ایسر ئٹ پارے کہ بی ایل ایف وڈھ ئنا علاقہ وہیر ئٹی معدنیات دروکا ٹرک آتا جلہو کرسا ہُشنگ نا زمہ واری ئے ہرفک۔
