بی ایل اے تینا میڈیا چینل ہکل آ آپریشن ہیروف ئٹی بشخ ہلوکا حوا بلوچ نا اونا لُمہ تون اوار ویڈیو ئے شنگ کرے۔
بی ایل اے حوا بلوچ نا لُمہ نا چائنداری ئے اما لعل جان نا پن ئٹ کرے، بی ایل اے نا رد ئٹ حوا بلوچ نا باوہ ناکو نبی بخش ہم بی ایل اے نا سرمچار ئس اسک ہرا 08 نومبر 2021 آ شہید مسس۔
بی ایل اے نا نیمہ غان اِرا منٹ دہ سکینڈ نا ویڈیو ٹی حوا و اونا لُمہ اما لعل جان ئے خننگ مریک، ہراٹی اونا لُمہ بلوچستان نا بیرک ئے کاٹم آ شاغانگ ءِ و اوفک اسٹ ایلو ئے بھاکُر کرسہ مہر تننگ ءُ۔
ویڈیو نا اسہ بشخ ئسیٹی حوا بلوچ کلہو ترسا پائک کہ ای کُل سنگت آتا لُمہ تے ہندا پاوہ کہ اوفتے لُمہ یاسمین نا وڑ ئٹ سوگو مروئی ءِ۔ او تینا اولاد آتے تسلی ایتر و اوفتا شہادت آ غمگین مفس، انتئے کہ اوفتا چُناک تینا سرزمین نا رکھنگ کن تینے قربان کننگ ءُ۔ لمہ آک یاسمین نا وڑ ئٹ سوگو مریر، اوفتے تینا اولاد آتے تسلی ترسا سرزمین نا رکھنگ کن رائی کروئی ءِ۔ اینو ننا سرزمین ئے ننا قربانی تا ضرورت ءِ۔
حوا بلوچ پائک کہ ننا قربانی آن بروکا نسل آک اسہ خوشحال ءُ زند ئس گدریفور، ہندا سوب آن ننے قربانی تروئی ءِ۔ ای لُمہ تے پاننگ خواہوہ کہ اوفک سوگو مریر۔
ویڈیو نا ایسر ئٹ حوا بلوچ و مجید بریگیڈ نا زالبول فدائین تے ٹریننگ و فوجی مشق کننگ آ خننگ مریک۔
حوا بلوچ نبی بخش بلوچ نا مسڑ اسک و ضلع کیچ ئنا ہند تمپ کوہاڈ نا ہندی ئس اسک۔ حوا بلوچ بی ایل اے مجید بریگیڈ نا آپریشن ہیروف نا فیز ٹو نا وخت گوادر نا محاذ آ جنگ کرسا شہید مسس۔
