کوئٹہ آن زوراکی ئٹ بیگواہ کننگوک آ ورنا نا آجوئی کن ایم-8 کسر اسہ وارس پدا بند کننگانے و زیمی مروکا خاہوت نا برانز داسکان برجاء ءِ۔
حوال تا رد ئٹ شہزاد ولد منیر احمد ہیرونک نا ہندی ئے 05 نومبر 2025 آ کوئٹہ آن زوراکی ئٹ بیگواہ کننگانے۔ کیہی دے گدرینگ آن پد ہم اونا بابت ئٹ ہچو حوال ئس مونا بتنے ہرانا سوب اینو خاہوت برانز کرسا ایم-8 کسر ئے بلاک کرینے۔
برانزی تہ پاننگ ءِ کہ کالخواہ تا نیمہ غان نہ ورنا نا آجوئی عمل ئٹ بسنے نہ اونا زوراکی ئٹ بیگواہی نا بابت ئٹ صاف ءُ حوال تننگ ءُ، ہراڑا مجبور مرسہ اوفک کسر ئے بند کرینو۔
خاہوت خواست کرینے کہ شہزاد ئے زوت آجو کننگے یا اونا زوراکی ئٹ بیگواہی نا بابت ئٹ راستی ئےاُلس ئنا مونا ہتنگ مرے۔
یات مرے کہ داکان مُست مُسہ دے اسکان سی پیک کسر ئے ہم اِرا زالبول تا زوراکی ئٹ بیگواہی نا برخلاف بند کننگاسس۔ پنچ شمبے نا شام ڈپٹی کمشنر کیچ، بشیر احمد بڑیچ نا نیمہ غان زالبول آتا زوت آجوئی نا یخین تننگ آن پد مذاکرات سرسوب مسس ہراڑان پد برانز ئے ایسر کننگاسس۔
