بی واسی ئی نا رہشون سمی دین بلوچ تینا شنگ کروک ویڈیو کلہو ئسیٹی پارے کہ بلوچستان ئٹی اسہ پین خراب ءُ حالیت ئس ودی مننگ ءِ۔ داسہ بلوچ زالبول آتا بیگواہ کننگ میار ئس اف بلکن دود ئس جوڑ مسُنے۔ ہڑدے پوسکنو کیس ئس مونی بریک کہ زالبول آک خاہوت آتا مون آن بیدس دوبہ آن دزگیر و بیگواہ کننگرہ۔
سمی دین پارے کہ ہمو گڑا نا بابت ئٹ گُمان کننگ متنے داسا دود ئس جوڑ مسنے۔ بلوچستان ئٹی بھلو وخت ئسے آن زوراکی ئٹ بیگواہی برجاء مسنے و داسہ زالبول آتے ہم نشانہ کننگ ءُ۔ ہرافتیٹی چُنک سن آ مسڑ، پاڷ کنوکا چُنا تا لُمہ آک، پَڈ پُر انگا زالبول آک ہم تُد ءُ۔
او پارے کہ داسہ مزاحمت کن بلوچ زالبول آک مونی خننگ مریرہ۔ اوفک لُمہ، مسڑ و ایڑ ئنا دروشم ئٹی ءُ۔ اوفتے نشانہ کننگ ہندُنو ہیت ئس اف بلکن دا انصاف خواہوک آتے خُلیفنگ، بندغ آتا ہمت ئے پرغنگ و اوفتا خاہوت آتے سزا تننگ نا کوشست ئسے۔
بی وائی سی نا رہشون پارے کہ دا زوراکی تیا بے توار مننگ ظالم تون بشخدار مننگ ءِ۔ای زند ئنا کُل بشخ آتیان سیالی تخوکا بندغ آتیان خواست کیوہ کہ اوفک زوراکی ئٹ بیگواہی تا برخلاف توار بُڑز کیر و بی وائی سی نا دا مہم نا بشخ مریر و کُل بیگواہ کننگوک آ بلوچ زالبول آتا زوت آجوئی نا خواست کیر۔
