آواران نا علاقہ جھاؤ و خضدار نا علاقہ اورناچ و گریشہ ٹی پاکستانی فوج ئنا لشکر کشی برجاء ءِ۔
جہی حوال تا رد ئٹ جھاؤ نا علاقہ کوہڑو ٹی فوج ئنا بھلو کچ ئس ہنانے، و ہیب ئہ کھیب ئنا خلق آتے پنت کننگانے کہ او تینا اُرا تیان پیشتمپس و ہچ جاگہ ہنپس۔
اندن حوال ءِ کہ پاکستانی فوج اورناچ (خضدار) ئٹ ہم تینا فوج ئنا بھلو کچ ئس رادہ کرینے ہراڑان علاقہ ئٹ لشکر کشی بناء مننگ نا خلیس ءِ۔
ایلو کنڈ آن، خضدار نا علاقہ گریشہ ئٹ ہم لشکر کشی برجاء ءِ، پاکستانی فوج کیہی بندغ آتے دزگیر کننگ آن گڈ بیگواہ کرینے۔
بیگواہ کننگوک بندغ آتیٹ سلیم بلوچ ولد بلو خان، زاہد بلوچ ولد زہری خان، بشیر احمد ولد زہری خان، عبدالغنی ساجدی ولد الہی بخش ضمیر بلوچ ولد واحد، عارف ھمبل ولد گاجیان ظہور بلوچ ولد پتے محمد اوار ءُ۔
پن کروک بندغ آک غٹ گریشہ نا علاقہ بدرنگ آن پاکستانی فوج ئنا دو آن بیگواہ کننگانو۔
واہم ایلو بیگواہ کننگوک بندغ آتا دائسکان چائنداری مننگ کتنے۔
