بلوچستان نا دارالحکومت کوئٹہ و کچھی نا علاقہ ڈھاڈر نا اِرا جتا ہند آتیا بمب تراک ئنا حوال ارے۔ واہم ارٹنگا تدینی تیٹی پین جانی نسخان نا حوال اف۔
ہندُن دشت آن نادرست او بندغ ئسینا جون خننگانے۔
پولیس نا رد ئٹ کوئٹہ سریاب کسر آ محکمہ زراعت نا دفتر نا خڑک نادرست موٹر سائیکل سوار آک دستی بمب ئس خسار ہرا بھلو تراک ئس کرے، ہراٹی جانی نسخان متنے۔
ہندن ضلع کچھی نا شہر ڈھاڈر ئٹی سرکٹ آفس نا خڑک کسر نا رَہا تخوک بمب ترخانے، واہم دا تراک ئٹی ہچو نسخان متنے۔
ایلو نیمہ غا کوئٹہ نا علاقہ دشت آن نادرست بندغ ئسینا سم خلوک او جون ئس خننگانے. پولیس جون ئے دوئی کرسا اسپتال آ درے ہراڑے المی کاروائی آن پد جون ئے چائنداری کن مردہ خانہ ٹی تخنگانے۔
