بلوچ سیاسی سروک رحیم بلوچ ایڈوکیٹ چاگڑدی حوالکاری میڈیا غا پوسٹ ئس کرسا پرے کہ ریاستی بھلنی ٹی کاریم کروک سلاہ بند ٹولی نا دو آن نال، خضدار ئٹ شاہجہان بلوچ ئے کھسفنگ نا مزمت ئے کیوہ۔ شہید شاہجہان بلوچ 2014 آن پاکستانی لشکر نا دو آن زوراکی ئٹ بیگواہ کننگوک بلوچ راہشون و بی ایس او آزاد نا مسکوہی چیئرمین زاہد بلوچ نا ایلم اسک۔
اونا پاننگ اس کہ شاہجہان بلوچ نا خون دا ہیت ئنا پارہ غا اشارہ کیک کہ بلوچ راجی تحریک آزادی نا دو آن سیاسی، سفارتی، اخلاقی و لشکری محاز آ تیا اسہ وڑ بےسوبی نا سوب آن کوزہ گیر ریاست پاکستان کرن آ تیان برجاء بلوچ زنک ایسری نا تینا بے بندغی پالیسی تیٹ پین ترندی ہترِسہ تاغت نا زور آ بلوچ راج و راجی تحریک آزادی ئے توننگ خواہک۔ جہان نا تاریخ گواہ ءِ کہ کوزہ گیر، ظالم و جابر تاغت آک محکوم راج آتا تحریک آزادی نا ایسری ئے مدام پین ظلم و استبداد ئٹ پٹانو، ولے اونا بھرم مدام کوزہ گیر و ظالم نا شکست نا دروشم ئٹ پیشتمِک۔ کوزہ گیر ریاست پاکستان نا حکمران تہ ہم تاغت کارمرز کننگ آن بیدس بلوچ تحریک آزادی نا ہچو حل ئس سجھیپک۔ کوزہ گیر ریاست و اونا جہی کمکارک ہخس کہ ظلم و جبر کیر ولے آزادی کن بلوچ راجی عزم ئنا مون آ بے سوبی اونا مقدر ءِ۔
او ودیک پارے کہ ای سکیورٹی کونسل نا مستقل باسک آتون اوار تنظیم و اقوام متحدہ و کوزہ کننگوک بلوچستان نا ہمسایہ ملک آ تیان خواست کیوہ کہ مونی برِسہ بلوچ زنک کشی ئے توننگ و بلوچستان نا آزاتی کن تینا دیہاڑی کڑد ئے سر تیر۔
او ایسر ئٹ پارے کہ ای ڈکھ ئنا دا ساہت ئٹ شہید شاہجہان بلوچ نا خاہوت تون اوار اُٹ و دعا کیوہ کہ اللہ تعالیٰ شہید ئے جنت الفردوس ئٹ جاگہ ایتِہ و اونا خاہوت ئے صبر ئنا توفیق عطاء کے۔
