بلوچ یکجہتی کمیٹی نا سربر ڈاکٹر ماہ رنگ بلوچ تینا شنگ کروک بیان ئسیٹی پارینے کہ ای ایمان مزاری و حادی علی چھٹہ نا انصاف، بندغی حق و ہر بندغ نا شرف ئکن جہد ئٹی اوار اُٹ۔ اوفتے ہمت و جہد ئٹ بے توار مروئی اف۔
ماہ رنگ پارے کہ آجوئی نا وڑ ءُ لیکہ آتا درشان کننگ و بنداوی حق آتے ہلنگ پُھلنگانے، ہندا وڑ ریاستی ادارہ تا نیمہ غان مروکا زوراکی کننگ آن بیدس نوآبادکاری نا وخت ئنا قانود آتے بندغی حق آتیکن کاریم کروک آتے بے توار کننگ کِن کارمرز کننگ ءُ۔
ڈاکٹر ماہ رنگ بلوچ پارے کہ بھاز سال آن ایمان و حادی بندغی حق آتیکن کُل آن مونا مسُنو۔ ہر وڑ ئنا نا انصافی تا برخلاف توار بُڑز کننگ ءُ۔ اوفتا برخلاف جوڑ کروکا عرضی، ریاست نا زوراکی تے پاش کیک۔ دا ہیت ہندا راستی ئے پاش کیک کہ انصاف نا نظام ہرا کچ ئٹ بندغی حق آتا باسک آتا برخلاف دا قانود تے کارمرز کننگ ءُ۔
اونا پاننگ اسک کہ ای جہانی پِڑ آ ترندی ئٹ پاوہ کہ ایمان و حادی نا سلامتی کن یخین تننگ مرے و اوفتا برخلاف خلوک آ بے بنیات بھتام آک تیبہ ایسر کننگ مریر و کیس آتا پٹ ئہ پول نا خواست کینہ۔ قانود ئے زوراکی کن کارمرز کننگ ایسر کننگے و انصاف کننگ مرے۔
