بلوچستان نا دار الحکومت کوئٹہ و مستونگ آن پاکستانی لشکر نا دو آن خوانندہ تیتون اوار مُسہ ورنا زوراکی ئٹ بیگواہ کننگانو۔
بلوچستان یونیورسٹی نا شعبہ تعلیم نا خوانندہ سید احمد شاہ ولد سید ظاہر شاہ ئے 01 دسمبر نا شام ئنا 10:00 بجہ غا پاکستانی ڈھکوک ادارہ آک زوراکی ئٹ بیگواہ کریر۔
خوانندہ ئے بلوچستان یونیورسٹی نا گیٹ ئنا مون آن زوراکی ئٹ بیگواہ کریر۔ ہمو وخت آ ساڑی بندغ آتا پاننگ ءِ کہ اسہ مون شیشہ ئی او لاری سیٹی سوار سلاہ بند بندغ آک ورنا ئے زور ئٹ بیگواہ کریر۔
ایلو نیمہ غا مستونگ نا علاقہ دشت، جلب گندان آن پاکستانی لشکر نا دو آن اِرا ورنا ندیم کرد ولد مہیم خان جلب گندان نا ہندی و فرید کرد ولد محمد رفیق کرد ریلوے سوسائٹی کوئٹہ نا ہندی ئے زوراکی ئٹ بیگواہ کریر۔
