سلہہ بند بندغ آک بلوچستان آن اسہ ڈپٹی کمشنر، سپریڈنٹ پولیس و ہفت پولیس کارندہ تے ہم برمتہ کرینو ۔
بلوچستان نا جتاء جتاء ضلع تیان سلہہ بند بندغ آک ہنوکا اِرا دے نا وخت کیہی سرکاری افسر و پولیس کارندہ تے برمتہ کرینو، ہرافتے دائسکان مونا ہتنگ متنے ۔
حوال تا رد ئٹ خاران نا ڈپٹی کمشنر منیر احمد سومرو ءِ یک شمبے نا دے کوئٹہ آن خاران آ ہننگ نا وخت پتکن برشونکی نا ٹک آن برمتہ کننگا اوڑتون اوار پولیس کانسٹیبل گن مین محمد یوسف، پولیس ڈرائیور پیرک و مہمان ئس نصر اللہ ءِ ہم بیگواہ کرینو۔
ایلو پارہ غان کوئٹہ نا علاقہ پنجپائی نا خُڑک نادرُست سلہہ بند بندغ آک ہفتہ نا دے ناکہ بندی کرسا آر آر جی کارندہ تون مُسہ پولیس کارندہ تے بیگواہ کریر۔ہرافک برام ئس آ ہننگ اسُر، اندا وخت مستونگ درینگڑھ اسہ پین پولیس کارندہ عبدالرسول سمالانی ئے ہفتہ نا دے سلہہ بند بندغ آک برمتہ کریر۔
اندا وڑ ہفتہ نا دے چاغی آن نادُرست سلہہ بند بندغ آک قائم مقام ایس ایچ او گل شاہ خان محمد حسنی ءِ برمتہ کریر ہرا داسکان آجو متنے ۔
