تربت شاپک نا ہندی زالبول آک سئے شمبے نا دے تربت پریس کلب ئٹی پریس کانفرنس کریر کہ اوفتا پنچ چُنا چار تو آن بیگواہ ءُ و بھاز برانز و کالخواہ تیتون حوال آن پد ہم ہچو دیمروی ئس متنے۔
زالبول تا رد ئٹ 28 اگست آ کوئٹہ نا علاقہ عیسیٰ نگری آن اوفتا پنچ چُنا شاہ بیک ولد ماسٹر اسلم، قدیر، اکرم ولد ماسٹر تفصیر، قدیر ولد پھلین و محمد یاسین ولد مسکان ئے اوار برمتہ کریسُر و اوکان پد اوفتا بابت ئٹ ہچو حوال ئس اف۔ ہندُن صدام ولد محراب ئے جولائی ٹی جوسک نا علاقہ آن بیگواہ کننگاسس ہرا داسکان بیگواہ ءِ۔
خاہوت آتا پاننگ ءِ کہ اوفک ڈپٹی کمشنر، کمشنر تون و کالخواہ تیتو کیہی وار توسنو و تران کرینو، فریاد سر کرینو ولے چار تو گدرینگ آن پد ہم اوفتا چُناک آجو متنو و نہ اوفتا حالیت و جاگہ نا بابت ئٹ پاننگ مسنے۔
پریس کانفرنس ئٹی پاننگا کہ بیگواہ کننگوک آک خوانندہ ءُ ہرا خواننگ کن کوئٹہ ٹی اسُر۔
زالبول آک پڑو کریر کہ اگہ مُسِہ دے ئٹی اوفتا چُناتے آجو کننگ متو تو اوفک تعلیمی چوک، کمشنری روڈ و ایلو بھلا کسر تے بند کننگ آ بیوس مرور۔
