بلوچ اسٹوڈنٹس ایکشن کمیٹی نا ارٹمیکو بنجاہی کمیٹی نا اجلاس اڈ تننگا، مبارک قاضی نا یات ئٹ پَسِّنی ٹی پروگرام اڈ تننگ نا فیصلہ
تنظیم نا کیڈرز آک اینو تیوعہ بلوچستان ئٹی ادارتی پروگرام آتا ردئٹ تینا ذمہ واری تے پورو کننگو ہرا کہ اوفتا سیاسی سوگوی نا درشانی ءِ ۔
کماش شبیر بلوچ بلوچ اسٹوڈنٹس ایکشن کمیٹی نا ارٹمیکو بنجاہی اجلاس بنجاہی کماش شبیر بلوچ نا کماشی ٹی اڈ تننگا۔
بنجاہی کمیٹی نا اجلاس اِرا دے اسکان برجاء مس ہراٹی بنجاہی سیکریٹری جنرل نا رپورٹ، نغدی نشست، تنظیمی امور، علاقائی و جہانی سیاسی حالیت و آئندہ لائحہ عمل نا ایجنڈہ آک زیر بحث ہتنگار۔ آئندہ لائحہ عمل نا ایجنڈہ ٹی جتا جتاانگا فیصلہ آک ہرفنگ مسر۔
اجلاس نا اولیکو دے تنظیمی سیکریٹری رپورٹ نا زی آ شابیتی شرہ مس و تیوہ ہنکین کاریم تا زی آ ہیت و گپ مس ہراٹی تنظیم نا غٹ ہنکین آتا فعالیت، بلوچ لٹریسی کیمپین، بلوچستان کتاب کاروان تون اوار ایلو غٹ تنظیمی کاریم تا حوالہ ئٹ تران مس۔
اجلاس نا ارٹمیکو ایجنڈا نغدی نشست ئس ہراٹی بنجاہی کمیٹی نا سنگتاک تنظیم نا غٹ کاریم تے نغدی نظر اٹ ہریسہ اوفتیا تینا خیال آتا درشانی ءِ کریر۔ دا ردئٹ زمہ وار آک ہیت کریسہ پاریر کہ سیاسی کاریم تا درستی کن نغدی عمل بھاز ارزشت تخک ہندا خاطران تنظیم نا تہٹی نغدی عمل ءِ برجا تخنگ المی ءِ ۔ سنگت آتا پاننگ ئس کہ اسہ سیاسی ءُ سنگت ئسے تینٹ ہم نغدی عمل آن گدرینگ نا گرج مریک تاکہ او تینا سیاسی سفر ئٹ تینے ہر وڑ ئنا غیر سیاسی کاریم تیان مر تخنگ کے۔ سیاسی کاریمک ہمو وخت سوگو مننگ کیرہ ہراتم اوفتون علم اوار مرے ولے اسہ سیاسی کارکن ئسے نا عمل اگہ نغدی عمل آن گدرینگتو گڑا اود ٹی سوبری و سوگوی بفک ہندا خاطران غٹ کیڈرز آک تینا سیاسی عمل ئٹ نغدی سوچ ءِ مونا ہتیر تاکہ سیاسی عمل پین گروشک ایتے۔
دیوان اولیکو دے ہندا ایجنڈہ آتے شرہ ٹی ہتریسہ کماش شبیر بلوچ نا موکل ئٹ ایسر کننگا و ایلو دے ئکن سیکریٹری جنرل کماش آن موکل ہلیسہ دیوان ءِ بناء کرے۔ اجلاس نا مسٹمیکو ایجنڈہ تنظیمی امور ئس ہراٹی سنگتاک ہیت کریسہ پاریر کہ جہان نا ایلو راج آتا ورنا تا خڑک مننگ کیک ورنا تا راجی و سیاسی رمل بیرہ کتابی شرہ اس مرے ولے ننا خوش بختی ءِ کہ نن دا سیاسی عمل ءِ بیرہ تینا خن تیٹ خننگ افن بلکن اونا بشخس ہم ارین۔ تنظیم اینو راجی گل ئنا دروشم ہلکنے و ورنا تا راجی زمہ واری تے پورو کننگے۔ تنظیم نا سیاسی عمل اینو بیرہ اسہ علاقہ سیسکان اف بلکن بلوچستان نا ہر کنڈ ئٹی تالان مسنے و بلوچ چاگڑد ءِ علمی و سیاسی شونداری نا پارہ غا دننگے۔ ولے ننا سنگتاک سرپد مریر کہ نن ہخس زیات ورنا تے دا سیاسی عمل تون تفون ہموخس ننا زمہ واریک ہم گیشتر مرور ہرافتے پورو کننگ کن ننے تینے سیاسی و علمی حوالہ ئٹ تیار کروئی مرو۔
ایجنڈہ نا گڈسر ئٹ کماش شبیر بلوچ پارے کہ بلوچ خوانندہ گل ئنا بستار ئٹ نن بلوچ خوانندہ آتا سیاسی و علمی کاریم تے برجا تخانن ہراٹی خوانندہ آتا سیاسی و زہنی تربیت نا زمہ تینا کوپہ آتیا ارفینو۔ نن راجدوستی نا عمل آ کاربند جہدکار اُن و راجی جوڑشت عمل نا بشخ اُن ہندا خاطران نن پہہ مرین کہ بیرہ تینا جند ئنا سیاسی تربیت آخہ بلکن غٹ بلوچ ورنا تا سیاسی و علمی تربیت نا زمہ ننا کوپہ آتیاٹے و دادے گچین وڑئٹ پورو کننگ نا گرج ارے۔ تینا ہیب کھیب ساڑی بلوچ ورنا تے تینا سیاسی دیوان آتا بشخ جوڑ کریسہ اوفتا علمی و فکری تربیت کننگ ننا کاریم ءِ ۔ اینو تنظیم تینا باسک آتے دا حد اسکان علمی و فکری حوالہ ئٹ سوگو کرینے کہ اوفک بلوچستان نا کنڈ کنڈ ئٹ تنظیمی کاریم تے سوگوی ئٹ مستی دننگو۔ نن گمر ئٹ پانہ کہ تنظیم نا بنجاہی راہشونی آن ہلیس بنزہ نا باسک آتے اسکان اوفتا جہد و کوشست آتیان پد اینو تنظیم بلوچستان نا کنڈ کنڈ ئٹ سر مسنے و کاریم کننگے۔ دا سیاسی کاریم نا سوب آن اینو بلوچستان نا تہٹی راجی شعور ہڑدے سوگو مریسہ ءِ ۔ بلوچ ورناک تینا خڑک نا سیاسی حالیت آتے پہہ مریسہ اسہ سوگو ءُ لٹریچر اس خواننگ نا کنڈ آ کار ہراڑان اوفک راجی جوڑشت نا عمل آن آگاہ مریر و اوفک چاگڑد نا تہٹی تینا گچینو کڑدار اس مونا ہتیر۔
تنظیمی امور آن پد عالمی و علاقائی سیاسی حالیت آتا ایجنڈا بنا مس ہراٹی تنظیمی سنگتاک ہیت کریسہ پاریر کہ بلوچ نا جہد اینو ایلو راج آتیکن اسہ مثیل اس جوڑ مسنے۔ ہندا سیاسی جہد نا سوب آن اینو بلوچ چاگڑد نا تہٹی سیاسی شعور اس ودی مسنے ہراڑے چنا و نیاڑی تیان ہلیس کماش آتیسکان غٹ تینا زمہ واری تیان پہہ ءُ ۔ سیاسی جہد نا مونا مدام اڑاند شاغنگ مسنے و مستی ہم سیاسی جہدکار آتے دا مشکل آتیان گدرینگوئی مرو ولے بلوچ ورناک سرپد مریر کہ سیاسی جہد نا چاگڑد نا تہٹی تینا اہمیت اس ارے ہراد چاگڑد ءِ بدل کننگ ٹی اسہ بھلو کڑدار اس مونا ہتیک۔
جہانی سیاست نا زی آ ہیت کریسہ سنگتاک پاریر کہ اینو جہانی سیاست نا طاغت اسہ بنجاہ آن پیشتمسا کیہی ہند آتیا سرمسنے، داسا اسہ یا اِرا بلاک آخہ بلکن کہی بلاک آک جوڑ مسنو ہرافک تینا مفاد آتیکن جہد کننگ ءُ۔ بلوچ ورناک تینا چاگڑد ءِ ہُننگ تون اوار اودے سرپد مننگ کن لٹریچر تون ہم خڑکی کیر تاکہ اوفک خطہ ئٹ مٹ مروکا حالیت آتیان آگاہ مریسہ تینا راجی مفاد آتے ہُننگ کیر و سرپد مریر۔ ہر راج ئنا علاقائی حالیت آک اونا زی آ زیم شاغرہ و بلوچ ڈغار ئٹ مٹ مروکا حالیت آک بلوچستان ئے ہم زیمی کننگ کیرہ۔
اجلاس نا ایسری ایجنڈا آئندہ لائحہ عمل ئٹی ئس ہراٹی تنظیم نا سنگتاک تنظیمی امور نا تہٹی مروکا گپ و تران و سنگت آتا پارہ غان تروکا مشورہ آتے ہریسہ کیہی فیصلہ ارفیر۔ ہرافتیٹی لمئی بولی تا جہانی دے ءِ مبارک قاضی نا پنا کریسہ اونا یاد ئٹ پسنی ٹی پروگرام اڈ تننگ، لمئی بولی تا جہانی دے ئنا ردئٹ کتاب شینک کننگ، چنا تیکن گام کلاس اڈ تننگ، شال و نصیرآباد ئٹ صبا فیسٹیول نا اڈ تننگ، دو مارچ بلوچ کلچر ڈے ئنا دے ئکن پروگرام اڈ تننگ، بلوچ لٹریسی کیمپین ءِ گیشتر سوگو کریسہ سائنسی کلاس اڈ تننگ و وخت ئتون اوار بلوچستان نا خواننگ نا زی آ بیان تننگ، بلوچستان کتاب کاروان ءِ سوگو کننگ، گام و نوشت میگزین آتے زوت شینک کننگ و پین چنکو بھلو فیصلہ ارفنگا۔
غٹ ایجنڈا تیا شابیتی گپ و تران و آئندہ لائحہ عمل ئٹ فیصلہ آتیان پد کماش شبیر بلوچ نا موکل تون اِرا دے نا بنجاہی کمیٹی نا اجلاس ایسر مس۔
