بے گناہ آ چُنا و زالبول آتا جلہو ئے شیف خلینہ، دا اِرا ریاست آتا جنگ ئس اف، بلکہ بلوچ نا نسل کشیءِ۔
بلوچ وومن فورم نا مرکزی جارکش تینا شنگ کروکا درشان ئٹی پارے کہ بلوچ نسل کشی نا تاریخ ئٹی بدتر ءُ وخت ئسیٹ گدرینگءِ، بلوچ آتا برخلاف بلو طاقت کارمرز مننگءِ بلوچ ورناتے بیگواہ کننگ ٹپ ٹور آ جون آتا بِٹنگ، اُراتے ہُشنگ و چنا و نیاڑی تے خلنگ بلوچ نسل کشی نا تسلسلءِ۔
جارکش پارے کہ تِدوکا دے ایران نا نیمہ آن بلوچستان نا شہر پنجگور ئٹی لس مخلوق نا اُراتا بمباری کننگا، ہراٹی کیہی چنا و نیاڑیک شہید مسُر، ہرافتا اُراک بھُس مسُر۔
ایلو دے پاکستان بلوچ آتا برخلاف کاروائی کرسا ایران زیر انتظام بلوچستان نا شہر سراوان شمسر ئٹی لس مخلوق ئے ٹِک کرسا ڈرون، و پوسکُنا آ میزئل و جنگی سلاہ آتیٹ بیوس آ بلوچ آتا اُراتے بمباری کریر ہراٹی 10 چنا و نیاڑیک شہید مسُر، شہید مروکا کُل بندغ آک بلوچءُ۔
بلوچ وومن فورم نا جارکش پارے کہ بلوچستان ئٹی برجاء انگا لشکر کشی، خلنگ و بِٹنگ نا پالیسی تہ سوب آن کیہی بندغ آک بلوچستان ئے یلا کرسا ایلو ملک آتیٹی سیاسی پناہ ہلکنو۔ پاکستانی ادارہ آک اوفتے اوڈے ہم خلنگءُ، اوفتا برخلاف ہم کاروائی کننگءُ ہرانا مثال بلوچ زالبول بانک کریمہءِ ہرادے کینڈا ٹی شہید کننگا۔
جارکش پارے کہ زابلو و چُنا تے شہید کننگ ظلم و جبر ئنا ایسرءِ، بیوس آ بلوچ زالبول آتا جلہو کننگ، ہر ہمو بلوچ زالبول نا جُہدئے تو ننگ نا بے سُہب آ کوشتءِ کہ ہرافک بلوچستان ئٹی تینا حق آتیکن جُہد کننگءُ ۔
جارکش ایسر ئٹ پارے کہ جہانی جنگی قانون آتا رِد ئٹ جنگی ماحول ئٹی چنا و زالبول آتے خلنگ آ پابندیءِ، اوفک بندغی حق آتا ادارہ آک، جنیوا کنونشنز نا رِد ئٹ بلوچستان ئٹی لس مخلوق نا رکھیفنگ کن گام ہرفنگ مرے۔
