نوشت: گیابان بلوچ
براہوئی مٹ: مبارک بلوچ
زرمبش براہوئی
ڈغار نا مِہر و غلامی نا مارشت، دا ہمو اِرا گِڑا کو ہَرا اسہ عظیم ءُ مُہبر ئسے ودی کیرہ۔ اُست ئٹ وطن تون مہر کروکا ہمو مریک ہَرا تینا قوم و ڈغار کن ہر وڑ ئنا قربانی تننگ نا جوزہ تخِک۔ مُہبر ہمو مریک ہرادے تینا قوم ئنا زہنیت ئے پہہ مننگ نا لائخی دوئی مرے۔ مہبر ہمو مریک ہرا تینا جِند آ قوم ئے اولیت ایتک، ہرا قوم ئنا خوشحالی و رُژنا غا پگہ کن ہر وڑ ئنا قربانی ئے تینا فرض پہہ مرے۔ مُہبر ہمو مریک ہَرا تینا خواہش آتے قربان کرسہ قوم ئنا آسودئی و آجوئی کن جہد کے۔
شہید ڈاکٹر منان دا کُل لائخی تا خواجہ اسہ عظیم ءُ مُہبر ئس اسک، ہرا تینا قوم و وطن نا آجوئی کن ہر گڑا ئے قربان کرے۔ ڈاکٹر منان جان ہمو عظیم انگا بندغ آ تیان اسٹ اسک ہَرانا قربانی و شخصیت ئے لوز آتے ئٹ درشان کننگ اسہ ہم نوشتکار ئسے کن سُبک ءُ کاریم ئس افک۔ انتئے کہ اونا جہد و اندخئی ہندُن بھلُن ءِ کہ لوز آک اوفتا بڈ ئے ہرفنگ کپسہ۔
اینو ای ڈاکٹر منان جان نا عکس ئے خناٹ، تو کنے چُنکی نا اسہ تدینی ئس یاد بسک۔ کنا لوز آتیٹی ہمو تاغت اف کہ ڈاکٹر صاحب نا تیبہ شخصیت ئے درشان کیو۔ ولے ہمو تدینی ئے درشان کننگ نا کوشست کیوہ۔
او وخت کنا سن ہندُن یانزدہ دوانزدہ سال اسک ہراتم ڈاکٹر منان جان ننا خلق آ بسَّسک۔ جلسہ ئے چھٹفنگ آن پد اوفک تینا ٹولی تون اوار اسہ میڈیکل کیمپ ئس اڈ تِسُر و ننا خلق ئنا بندغ آتے مفت دارو درمان کریر۔
انتئے کہ ای زیات ناجوڑ مسُٹہ تو کنا لُمہ کنے نشان ترفنگ کن درے۔ ہراتم نن ڈاکٹر صاحب نا رہا سر مَسُن تو ڈاکٹر صاحب نا خوش انگا روشت ئے خنسہ ای حیران مسُٹ۔ او اولی ڈاکٹر اسک ہرادے ای داخس خوش اخلاق و مسخرہ کننگ آ خناٹ۔
او کنتون ہندا وڑ ئٹ ہیت کرے ای ماراٹ کہ او کنا ہم سَن ءُ سنگت ئس ءِ نہ کہ بھلو ڈاکٹر ئس۔ او کنا جوان ءُ وڑ ئسے ئٹ چیک اپ ئ کرے دارو تِس، کنا کوپہ غا دو ئے تِخِسہ پارے:
” زوت جوان مرک نم ننا قوم ئنا ورناک اُرے، نمے بھاز گِڑا کروئی ءِ اگہ نی ناجوڑ مریسہ تو دا قوم ئے غلامی نا زمزیر آتیان دیر آجو کرو؟”
کنا لُمہ پارے ” ڈاکٹر صاحب! دادے جوانیکا درمانکیس، دا ہر وخت ناجوڑ مریک باسنی ٹی دانا بامُس دِتر مریک ای بھاز فریشان اُٹ۔ “
ڈاکٹر منان تسلی تِس ”ایڑ فریشانی نا ہیت ئس افک، دا نزوری نا سوب آن مریک انشاء اللہ زوت جوان مرو و اسہ سوگو ءُ ورناس جوڑ مرو، ہرا تینا قوم و ڈغار نا رکھنگ کن اسہ پولات نا دیوال ئس جوڑ مرو۔”
کنا لُمّہ بشخندہ کرسٹ پارے” کنا ہم دا خواہش ءِ کہ دا بھلُن مرسہ تینا قوم ئنا خزمت ئے کے، نے آن بار اودے اونا ذمہ واری تا احساس مرے۔”
ڈاکٹر جان پارے ”بالکُل راست پاریس ایڑ! اگہ ننا قوم ئنا ہر لُمہ ئے دا شعور دوئی مرے کہ نن غلام اُن، و ننے دا غلامی نا برخلاف جہد کروئی ءِ تو ننے ہم تینا الواد آتے قربان کننگ آن پد سلوئی افک۔”
دا لُمّہ ڈغار ئے آجو کننگ کن نن کُل ئے ہر وڑ ئنا قربانی تننگ آن پد سلوئی مروف۔ ہراتم ننا قوم ئنا ہر بندغ ئٹی ہندن ءُ شعور ئس ودی مرو، تو او دیک مُر افس کہ نن آزات مرون۔ ولے ہمو دے ئکن ننے بے کچ قربانی تِروئی تمو۔“
