بلوچستان ئٹی زوراکی نا بیگواہی تا برخلاف کوئٹہ پریس کلب نا مونا برجاء وائس فار بلوچ مسنگ پرسنز نا برانز ئے ہفتہ نا دے 5845 دے پورو مسنے۔
دا وخت آ تنظیم ماہ جبین بنت غلام مصطفیٰ نا زوراکی نا بیگواہی ئے شیف خلِسہ پڑو کرے کہ ائید نا دے بیگواہ کننگوک بندغ آتا آجوئی کن برانز کننگ مرو۔
وی بی ایم پی نا راہشونک کوئٹہ ٹی برجاء برانزی کیمپ ئٹ اواری نا درشانی کن بروکا بندغ و خاہوت آتون ہیت کرسا پاریر کہ مرغنا برانز آن پد ہم بلوچ راج ئے اونا بنیاتی حق آتیان پد بِٹنگ مسنے و بلوچستان ئٹی زوراکی نا بیگواہی تا لڑ داسکان برجاء ءِ۔ اندا منہ وخت ئٹ زالبول تا زوراکی نا بیگواہی تیٹ ہم ودکی مسنے، ہرانا پوسکنا مثال ماہ جبین نا بیگواہی ءِ۔
تنظیم نا رد ئٹ ماہ جبین ضلع واشک نا علاقہ بیسیمہ آن تعلقداری تخک۔ او بلوچستان یونیورسٹی ٹی لائبریری سائنس نا شعبہ ئٹ خواناکہ۔
وی بی ایم پی نا پاننگ ءِ کہ ماہ جبین ئے سی ٹی ڈی شال آن دزگیر کننگ آن پدا زوراکی ئٹ بیگواہ کرینے۔
وی بی ایم پی پارینے کہ بلوچستان ئٹ ہراتم بندغ ئس زوراکی ئٹ بیگواہ کننگک، یا بیدس قانود کھسفنگک گڑا ہمو خاہوت ئے ہم ٹِک کننگک۔ سروک آک بی ایس او نا بیگواہ غا چیئرمین زاہد بلوچ نا ایلم شاہ جہان نا خون و ماہ جبین نا ایلم یونس نا زوراکی ئٹ بیگواہی ئے دا زوراکی تا مثال پاریر۔
او پاریر کہ دا بندغی حق آتا لتاڑ ءِ۔ زورانسری بیگواہ کننگ کونا ڈوہ ئے بلوچستان ئٹ ہڑدے نا کاریم ئس جوڑ کننگانے۔ پاکستانی کالخواک و اسٹیبلشمنٹ نا مخ تف بندغ آک سوشل میڈیا غا اندا عمل نا دفاع ئے کیرہ۔ دا تصور کہ "بے چہرہ جج آتا” و ” ڈھکوک عدالت” نا زریعت ئٹ بلوچ تحریک تون ہننگ مرے۔ نہ آئینی ءِ نہ اخلاقی۔ دہنا گھامک تاغت تخوکا طبقہ نا مفاد آتے رکھیرہ، نہ کہ انصاف ءِ۔
تنظیم پارینے کہ زورانسری بیگواہی تینٹ اسہ ناقابل معافی ڈوہ ئس ءِ، ولے زالبول تا بیگواہی اسہ بھاز حساس و چیڑگنو ویل ئس ءِ، ہرادے ہچ وڑ آ جواز جوڑ کننگ مفک۔ وی بی ایم پی حکومت آن خواست کرینے ماہ جبین، اونا ایلم یونس و ایلو بیگواہ کننگوک بندغ آتِہ زوت آجو کننگ مرے۔
وی بی ایم پی پڑو تسنے کہ ائید نا دے نہ بیرہ زوراکی نا بیگواہی تا برخلاف برانز کننگ مرو بلکن ذاکر مجید نا زوراکی نا بیگواہی ئے 16 سال پورو مننگ آ ہم اسہ برانز ئس کننگ مرو۔
یات مرے کہ ہر سال ائید نا وخت آ تنظیم ہمو بیگواہ کننگوک بندغ تا آجوئی کن برانز کیک ہرا کیہی سال تیان تینا خاہوت آتون اوار ائید کننگ آن پد بِٹنگ مسنو۔
