پانک ئنا توئی رپورٹ نا رد ئٹ بلوچستان ئٹی زوراکی نا بیگواہی و وے عدالت ریاستی خون ئنا تدینیک ہر وخت ئنا وڑ ئٹ برجاء ءُ۔ بلکن دافتیٹی بھلو کچ ئسے اسکان ودکی مسنے۔
بلوچ نیشنل موومنٹ نا بندغی حق آتا ادارہ پانک ئنا کنڈ آن شابیتی ئٹ شنگ مروک رپورٹ نا رد ئٹ بندغی حق آتا لتاڑ نا کیہی سوگو کاروائی تیٹی بلوچستان نا 18 ضلع ٹی بلوچ آبادی ئے ٹک کننگانے۔ پانک ئنا کنڈ آن ہر اسہ تدینی ئے پک کرسہ اودے رپورٹ نا بشخ جوڑ کننگانے۔
اپریل 2025 ئٹی 151 بندغ ئے فوج و ایلو ادارہ آک زوراکی ئٹ بیگواہ کرینو۔ غُٹ آن گیشتر زیمی مروکا ضلع کیچ ءِ ہراکان 53 بندغ زوراکی ئٹ بیگواہ کننگانو۔ اوکان پد گوادر ئٹی 19 و شال آن 18 بندغ نا بیگواہی نا حوال رسینگانے۔ ایلو ضلع آتیٹی بندغی حق آتا لتاڑ برجاء ءِ، ہرافتیٹی ڈیرہ بگٹی آن 13، پنجگور ئٹی 8، آواران ئٹی 7، سیبی ٹی 6، بارکھان ئٹی 5، کراچی و مستونگ ئٹی 4، لسبیلہ موسی خیل چاغی خضدار قلات ئٹی 2، 2 ہندن واشک خاران سوراب و نوشکی آن اسہ اسہ بندغ ئے بیگواہ کننگانے۔ دا حساب ئٹ تدینیک دا ظاہر کیرہ کہ بلوچ الس ئے اسہ رنگ ئٹ زوراکی تا گواچی کننگ مننگ ئٹی ءِ۔
پانک ئنا رپورٹ نا رد ئٹ زوراکی نا بیگواہی تا وخت آ بندغ آتے اوفتا خاہوت و جہان آن وے خبر تخنگِک۔ و کیہی کیس آتیٹی بیگواہ کننگوک آتے وے عدالت آن کھسفنگِک۔ اپریل نا تو ئٹی 50 بندغ پاکستانی لشکر نا زندان آتیان آجو مسنو۔ 23 بندغ ئے وے عدالت آن کھسفنگانے۔ دافتیٹی پاکستانی لشکر اوار ءِ۔ کیہی بندغ آک وے قانودی دزگیر کننگ مننگ نا یا لٹ ئہ کٹ نا وخت آ ٹپی ہم مسنو ولے اوفتا تیبہ کچ و حساب رسینگتنے۔
رپورٹ ئٹی زوراکی ئٹ بیگواہ کننگوک آتے زندان ئٹی کھسفنگ نا تدینی تا رپورٹ ہم شابیتی ئٹ شنگ کننگانے۔ اپریل 2025 ئٹی بلوچستان ئٹی وے قانودی ئٹ کھسفنگ نا تدینیک رپورٹ مسنو ہرافتیٹی کیہی بندغ آتے بیگواہی آن پد کھسفنگانے۔ عبدالمالک بلوچ ئے 11 اکتوبر 2024 آ کیچ آن بیگواہ کننگا و 4 اپریل آ اونا جون باغبانہ خضدار آن خننگا۔ شاہ نواز و ظہور احمد ئے 5 اپریل آ مشکے آواران آن بیگواہ کرسہ زندان ئٹی کھسفنگا۔ ہندن حبیب بلوچ ئے مارچ 2055 ئٹی بیگواہ کرسہ اوفتون اوار 5 اپریل آ کھسفنگا۔ ساحل بلوچ ہرا 12 سال نا چنا ئس ءِ اودے اپریل ئٹی پسنی گوادر آن بیگواہ کننگا، اندن اونا جون شاہ جان ہوٹل پسنی نا پد آن دو تما۔ محراب و خان محمد ئے 6 اپریل آ بیگواہ کرسہ کھسفنگا۔ حق نواز، شیرو و گل زمان بزدار ئے 5 اپریل آ بارکھان آن بیگواہ کرسہ دروغ ئنا مونتس ئٹی کھسفنگا۔ بہادر شفیع و اونا مسہ سیال ئے 7 اپریل آ وشبود پنجگور ئٹی ڈیتھ اسکواڈ نا کارندہ آک ٹک کرسہ کھسفیر۔ نادر بلوچ ئے کنداری مشکے آن بیگواہ کننگا و ایلو دے اونا جون خننگا۔ نظام بلوچ ئے پسنی آن بیگواہ کننگا اندن 16 اپریل آ اونا جون خننگا۔ فاروق بلوچ ئے 14 اپریل آ خضدار آن بیگواہ کننگا و 15 اپریل آ اونا جون نال آن خننگا۔ شیر خان نذر ئے تربت آن بیگواہ کرسہ 17 اپریل آ کھسفنگا۔ نبیل بلوچ ہرا تعلیم و صحافت تون تفوک اسک اودے تمپ کالج کیچ ئٹی سمکاری کرسہ کھسفنگا۔ ضلع دکی ٹی وے عدالت آن سرمچار پارِسہ کیہی بندغ آتے دروغ ئنا مونتس آتیٹی کھسفنگا۔ ہرافتیٹی محمد دین، اعجاز مری، نبیل مری و خیر محمد مری اوار ءُ۔
رپورٹ دا پھاش کیک کہ پاکستانی فوج دا تادی تیٹی تُد ءِ ہرا ہر وڑ ئنا قانودی کاروائی تیان آزات ءِ۔ زندان تا ہند و دزگیری نا بنجاہ تا معلومداری وے تننگ و زیمی مروکا تا خاہوت و وکیل آتے اوڑدئی آن توننگ دا بے بندغی آ روشت نا اسہ پھاشو دلیل ئس ءِ۔ پانک ئنا رپورٹ ئٹی پاکستانی لشکر نا مخ تفی ٹی جوڑ کروک ڈیتھ اسکواڈ نا ذریعت ئٹ کھسفنگ مروک بندغ آتا ذکر کننگا۔ ڈیتھ اسکواڈ پاکستانی لشکر نا مخ تفی ٹی بلوچستان ئٹی بے رحم و قانود آن چپ خونی مشین نا کڑدار ئے ادا کننگ ئٹی ءِ۔
پانک جہانی و ایلو ادارہ تیان خواست کرے کہ او زوت آن زوت دا کیس آتا آزاتی ئٹ پٹ و پول ئے کیر۔ زوراکی ئٹ بیگواہ کننگوک بندغ آتا رد ئٹ معلومداری تننگ مرے کہ اوفتے اراڑے، انتئے و انت ڈوھ ئسے نا رد ئٹ زندان آتیٹی تخنگانے و زوراکی ئٹ بیگواہی نا ذمہ وار تا برخلاف کاروائی کننگ مرے۔
پانک تینا رپورٹ نا ایسر ئٹ جہانی کہول آن خواست کرینے کہ او زوراکی ئٹ بیگواہ کننگوک بندغ آتا سلامتی کن جہانی کنوینشن نا توثیق و نفاذ ئے یخینی جوڑ کے و اندنو گام ہرفے ہرا بندغی حق آتا لتاڑ ئے توننگ کیر۔ زوت گامگیج ئس ہرفنگ متو تو بلوچستان ئٹی دا زوراکیک نہ بیرہ اسہ بندغ ئسے نا حق آتے زیمی کرور بلکن تیبہ خطہ نا امن و استحکام ئے زیمی کرو۔
