کاؤنٹر ٹیررزم ڈیپارٹمنٹ (سی ٹی ڈی) درے نن بلوچستان نا ضلع کیچ ئنا علاقہ کلاتک ئٹ چھاپہ خلنگ نا وختا پنی آ شنگکار و صحافی جمیل امام نا چُنکا ایلم کامران امام تون اوار پین اِرا بندغ دزگیر کننگ آن گُڈ نادرستو جاگہ ئس درے۔
خاہوت نا پاننگ ءِ کہ سی ٹی ڈی کارندہ غاک بھلو کچ ئسیٹی نن ئنا دو بجہ غا اُرا ئے گھیرہ کریر۔ اُراٹی پیہنگ تون اوار اُرا نا گِڑا تِہ پرغنگ بٹنگ و کماش و نیاڑی تیا بیدادی کننگ بناء کریر۔ اندا وختا او کامران امام و پدان خُڑک ئنا اُرا ئسے آن امتیاز خیال ئے دزگیر کریر دریر ہراکان گُڈ اوفتا ہچ ڈس ئہ حوال اف۔
اندن پاکستانی لشکر شش مئی آ ضلع کیچ ئنا علاقہ تجابان ئٹ محمد شفیع بلوچ ولد لہداد ئے دزگیر کرسا تینتو درینے و بیگواہ کرینے۔ اندا دے پن کروک علاقہ آن دولت بلوچ ولد بادل بلوچ پنیئو اسہ پین بندغ ئس بیگواہ کننگانے۔
7 مئی آ پاکستانی لشکر تحصیل تمپ ئنا علاقہ کوہاڈ ئٹ اسہ اُرا ئسے آ چھاپہ نا وختا ریاض احمد ولد ابراہیم بلوچ پنیئو اسہ بندغ ئس دزگیر کرسا بیگواہ کرینے۔
یات مرے ریاض احمد داکان مُست ہم پاکستانی لشکر نا دو آن زوراکی ئٹ بیگواہ کننگاسس و پدان آجو مسس۔ داسا دوارہ اودے زوراکی ئٹ بیگواہ کننگانے۔
بلوچ نیشنل موومنٹ نا بندغی حق آتا ادارہ پانک دا زوراکی نا بیگواہی تا حوال ئے پک کرینے و دادے سخت انگا لوز آتیٹ شیف خلکنے۔
پانک جہانی بندغی حق آتا تنظیم آتان خواست کرینے کہ او بلوچستان ئٹ بندغی حق آتا لتاڑ نا نوٹس ہلیر و دافتے توننگ کن گھام ہرفر۔
