بلوچستان نا ضلع کیچ ئنا بنجائی شار تربت آن پاکستانی لشکر اِرا ورنا دزگیر کننگ آن گُڈ بیگواہ کرے، اندن پسنی آن بیگواہ ورنا بیم تروک حالیت ئٹ آجو مس۔
حوال تا رد ئٹ تربت آن پاکستانی لشکر نا دو آن بیگواہ کننگوک بندغ آک خدابخش مندی و جما نا مار حاکم بلوچ نا پن ئٹ درست مسنو، ہرافتِہ اِرا دے مُست دزگیر کننگ آن گُڈ بیگواہ کننگانے۔
زوراکی ئٹ بیگواہ کننگوک خدابخش کیچ ئنا علاقہ ہوشاب نا جہی ئس ءِ، و حاکم بلوچ تربت نا علاقہ آسکانی نا جہی ئس ءِ۔
ایلو کنڈ آن بلوچستان نا دریابی شار گوادر نا تحصیل پسنی آن اِرا دے مُست پاکستانی لشکر نا دو آن بیگواہ کننگوک ورنا عامر داد بخش آجو مسنے، ولے اونا حالیت بیم تروک حد اسکان خراب پاننگک۔
خاہوت آن رسینگوکا حوال تا رد ئٹ عامر داد ئے آجوئی آن پد دمدستی پاک اومان اسپتال آ دننگا، ولے اونا حالیت بھاز خراب مننگ نا سوب آن اودے دمدستی کراچی آ رادہ کننگانے۔
پاننگک کہ اودے بھاز بیدادی نا گواچی کننگانے ہرا نا سوب آن اونا حالیت نازرک ءِ۔
