بلوچ یکجہتی کمیٹی نا راہشون بیبو بلوچ نا خاہوت نا رِد ئٹ، بیبو بلوچ نا قانودی ٹیم ئے اینو اوڑتون اوڑدئی کننگ کن پشین جیل آ دننگا ولے اوفتے تہٹی ہننگ نا موکل تِننگ متو۔
خاہوت نا رِد ئٹ جیل انتظامیہ بہانہ کرسا مہالو پارے کہ اسِہ بلو آفیسر ئسے نا موکل درکار ءِ، پدا یک مئی نا چھٹی تا حوالہ ئے تِسُر۔ ایلو کُنڈ آن ایلو بندغاک ہرافتیٹی ڈاکٹر آتا ٹولی اوار اس، تہٹی ہننگ نا موکل تننگ مس بیرہ بیبو بلوچ نا قانودی ٹیم ئے الیتوس۔
اینو اہم قانودی دستاویز آتیا دستخظ کروئی اس، انتئے کہ ہفتہ و یک شمبے آ عدالت و عدالتی دفترک بند مریرہ۔ ہُرے مننگ نا سوب آن قانودی کاروائی ئٹ پین ہڑاند ودی مننگ کیک۔ سوج دادے کہ بیبو بلوچ ئے اونا بنیادی حق آتینا انتئے پد بٹنگ ءُ۔
یات مرے کہ بیبو بلوچ ئے تھری MPO نا رد ئٹ اسِہ تو ئسے آن زیات ہدہ جیل ئٹی تخنگا۔ پدان اودے بےقانودی ننکان پشین جیل آ دننگ مس و اونا ضمانت نا خواست ئے بلوچستان ہائی کورٹ نا کُنڈ آن ہم رد کننگانے۔
