زور ئٹ بیگواہ کننگوک مہر گل مری نا ایڑ شال ئٹی پریس کلب نا مونا ‘وائس فار بلوچ مسنگ پرسنز’ نا کیمپ آن پریس کانفرنس ئس کرسا پارے کہ کنا ایلم مہر گل مری ئے اینو آن نُہہ سال مُست پاکستانی لشکر و اونا ادارہ غاک بیگواہ کریسر ہرانا داسکان ہچّو حوال افک۔
او پارے کہ نن اونا بیگواہی نا برخلاف کیس کرین و عدالت پارے کہ ایم آئی و ایف سی زوت مہر گل مری ئے پھاش کیر ولے او عدالت نا فرمان ئے بنتوس و دائسکان کنا ایلم نا ڈس اف۔
مہر گل مری نا ایڑ پارے کہ کنا ایلم کشت و کشار نا محکمہ ٹی ہژدہ گریڈ نا افسر ئس اسک و ڈیرہ بگٹی ٹی تینا زمہ واری تہ پورو کننگ ئٹی اس۔ نن تینا ایلم نا آجوئی کن ہر اسٹ نا در آ ہنان، نن ریڈ زون ئٹی پھر تیٹ چِھل دے اسکان اونا یلہ مننگ کن تولوک برانز کرین ولے دائسکان اونا حوال رسینگپک۔
او پارے کہ نن اِرا وار اسلام آباد ئٹی ہم تولوک برانز کرین ولے اوڑے ننے بے اومیتی آن ویتہ ہِچس دُو بتو۔
او پارے کہ ای غُٹ سکیورٹی ادارہ غا تیان و خاص وڑئٹ ڈی جی ایم آئی، ڈی جی آئی ایس آئی و آرمی چیف آن خواست کیوہ کہ کنا ایلم ئے پھاش کننگِہ و ننے دا مُرغنا ڈکھ آن آجو کننگہ۔
