بلوچستان نا ضلع کیچ ئنا علاقہ تربت آن پاکستانی لشکر و ڈھکوک ایجنسیک اِرا خوانندہ تون اوار مُسہ بندغ زوراکی ئٹ بیگواہ کرینو۔
حوال تا رد ئٹ تربت ڈی بلوچ آن عبدالمجید ولد عبدالغنی پنیئو اسہ پین ورنا ئسے پاکستانی ڈھکوک ایجنسیک زوراکی ئٹ بیگواہ کرینو۔
خاہوت پارینے کہ عبدالمجید ئے درے نن کراچی آن تربت آ بننگ نا وختا ڈی بلوچ نا ہند آ نادرست آ بندغ آک بیگواہ کرینو۔
تدینی نا وختا او تینا چُنا تتون اوار گاڑی نا انتظار ئٹی سلوک اس کہ نا گمان آ منَہ سلاہ بند بندغ اودے زوراکی ئٹ گاڑی ئسے ٹی سوار کرسا تینتو دریر۔
خاہوت نا پاننگ ءِ کہ دا اولیکو وار اف داکان مُست ہم عبدالمجید نا ایلم ئے ہم اندا وڑ زوراکی ئٹ بیگواہ کننگاسس ہرا پدان آجو مس۔
عبدلمجید نا خاہوت دا تدینی آ فریشانی نا درشانی کرسا حکومت و ذمہ وار ادارہ تیان اونا آجوئی نا خواست کرینے۔
اندن تربت آن پین اِرا ورنا خوانندہ پاکستانی لشکر دزگیر کننگ آن گُڈ بیگواہ کرے ہرافتا چاہنداری شہید الطاف بلوچ نا مار شئے حق و آدم سلیم نا پن ئٹ مسنے۔
خاہوت آتا پاننگ ءِ کہ شئے حق ہرا نا سن 17 سال ءِ و آدم سلیم ہرا نا سن 16 سال ءِ، ہڑتُما تِہ سئے شمبے 29 اپریل آ تربت آن پاکستانی لشکر و ڈھکوک ایجنسیک بیگواہ کرینو۔
او پاریر کہ ہڑتُما ورناک درو کراچی آن تربت آ بسوسُر، و تومکا فرسٹ ایئر نا خوانندہ ءُ۔ او تومکا ورنا تا سرسلامت آجوئی نا خواست کرینو۔
