پاکستان ئنا صوبہ سندھ ئٹی سندھ ئنا دریا آن بھلو جو کشنگ نا برخلاف برانز ئے پنچ دے مننگ ءِ۔ دا وخت سندھ و پنجاب نا نیام ئٹی ڈغاری آ کسرک، قومی کسر، عدالت و کراچی نا بندرگاہ نا کسرک بند کننگانو۔
"سندھو دریا ئے رکھنگ نا جنز” ئنا پن ئٹ برجاء دا برانزی مہم نا بھلنی ئے جتا قوم دوست جماعت، وکیل آتا تنظیم، خوانندہ تنظیم و چاگڑد نا باسک آک کننگ ئٹی ءُ۔ برانزی تا پاننگ ءِ کہ سندھ ئنا دریا آن پنجاب نا کنڈ آ شش بھلو جو کشنگ نا منصوبہ سندھ ئنا دیر ئنا، زمینداری نا و روزگار نا مڈی تے آ کوزہ نا کوشست ءِ۔
سندھ و پنجاب نا باڈر پوائنٹس دہن کہ کموں شہید، دیرا موڑ و ببرلو سکھر آ چرجوئی ئٹ برانز مننگ ئٹی ءِ۔ کراچی نا ہِنوک و بروک آ کسرک کاٹھور پل نا ہند آ ٹریفک نا ہِن ئہ بر کن بند ءُ۔ برانز کروکا تا پاننگ ءِ کہ برانز ہموتم اسکان برجاء مرو ہراتم اسکان کہ حکومت دا جو تا جوڑ کننگ نا نوٹیفکیشن ئے ایسر کپک۔
"سندھ وکیل کونسل” نا کنڈ آن شنگ مروک بیان ئٹی پاننگانے کہ اگہ بنجائی حکومت 72 ساہت اسکان دا منصوبہ آتے واپس ہلتو تو سندھ آن پنجاب آ ہنوکا کھل ریلوے لائن تے بند کننگو۔ داڑتو اوار اوار سندھ ئنا تیبہ عدالت آتیٹی کاریم ئے توننگو۔
بنجائی وزیر داخلہ رانا ثناء اللہ سندھ ئنا حکومت نا وزیر شرجیل میمن تون حوال کرِسہ جیڑہ آتے ہیت و گپ ئٹ ایسر کننگ نا کوشست کرینے۔ ولے قوم دوست جماعت و وکیل آتا تنظیم آک حکومت نا فیصلہ آن نمن کرِسہ داڑا وے باوری نا درشانی کرینو۔
دا جنر ہموتم بناء مس ہراتم پاکستان نا حکومت و آرمی چیف جنرل عاصم منیر ڈنی ڈیہہ تا سرمایہ کاری آن "گرین پاکستان انیشیئیٹو” نا بناء ئے کرے۔ ہندا منصوبہ نا رد ئٹ فوجی کمپنی ایس آئی ایف سی ئے سندھ ئنا دریا آن شش بھلو جو کشنگ نا ذمہ واری تننگا، ہراڑا سندھ ئٹی سخت سیاسی و چاگڑدی ورندی مونا بَس۔
جنز ئنا بھلنی ئے سندھ یونائیٹڈ پارٹی نا مُہبر سید زین شاہ، جیئے سندھ اتحاد، و جتا وکیل، خوانندہ و چاگڑدی تنظیم آک کننگ ئٹی ءُ۔ ہرافتا کھل ئنا موقف ءِ کہ سندھ ئنا دیر ئنا و ڈغار نا مڈی تے رکھنگ نا جنز برجاء تخنگ مرو۔
