بلوچ یکجہتی کمیٹی نا سروک سمی دین بلوچ پارینے کہ کراچی آن پین بلوچ خوانندہ استو ننکان زوراکی ئٹ بیگواہ کننگانو ہرافتیٹ چھار خوانندہ گمشاد غنی (ایم فل، شعبہ فلسفہ، کراچی یونیورسٹی)، دودا الہی (ششم سمسٹر، شعبہ جہانی تعلقداری، کراچی یونیورسٹی)، عبدالغفار نا مار مزمل (ششم سمسٹر، شعبہ فلسفہ، کراچی یونیورسٹی)، گمشاد نا مار معراج اوار ءُ۔
او پارے کہ داکان بیدس ابراہیم نا مار اسماعیل پنیئو ورناس، ہرا بلوچستان نا جہی ئس ءِ و دبئی آن روزگار آن گڈ اندا زوت ئٹ کراچی آ بسس، اودے ہم اندا وختا حسن اسکوائر آن زوراکی ئٹ بیگواہ کننگانے۔
سمی دین پارے کہ نن دا ریاست آن ہرّفِنہ کہ او اَرا قانود و ریاستی راہبند ءِ، ہرا بیرہ بلوچ آتیا خلنگانے؟ ہراڑے ہڑدیئی بنداو آ بلوچ ورنا تِہ زوراکی ئٹ بیگواہ کننگک؟ تیبہ جہان ئٹ ریاست آک قانود پرغوکا تِہ قانود نا رد ئٹ سزا ایترہ ولے پاکستان ئٹی ریاست تینٹ تینا قانود و ریاستی راہبند (آئین) ئے پرغِسہ زور ئنا بیگواہی کون آ ڈوہ ئے کننگ ءِ۔
