بلوچستان نا ضلع کیچ و ڈیرہ بگٹی آن پاکستانی لشکر دہ بندغ دزگیر کننگ آن گُڈ بیگواہ کرینے۔
شابیتی حوال تا رد ئٹ بلوچستان نا علاقہ تربت آپسر آن تعلقداری تخوک 37 سالی سیفا ولد مولا بخش ئے مُلخدو ننکان زوراکی ئٹ بیگواہ کننگانے۔
تدینی 20 اپریل 2025 آ نن ئنا 9 بجہ غا مسنے۔ خاہوت و خن ئٹ خنوک شاہد آتا رد ئٹ سیفا ئے اونا اُرا نا خُڑک آن زوراکی ئٹ گاڑی ئسے ٹی شاغِسہ بیگواہ کننگانے۔
پن کروک بندغ اسہ ڈرائیور ئس ءِ۔ اونا خاہوت نا پاننگ ءِ کہ اودے ملٹری انٹیلیجنس نا کارندہ غاک بیگواہ کرینو۔
اندن ضلع کیچ ئنا علاقہ بلیدہ نا ہند گلی آن تعلقداری تخوک عمر جان ولد حسن ئے اینو نادرست آ سلاہ بند بندغ آک بیگواہ کرینو۔
خاہوت آن رسینگوکا حوال تا رد ئٹ عمر جان ہڑدے نا وڑ سہب ئنا تینا کاریم تیکن اُراغان پیشتماسس ولے زرہ ئسے آن گُڈ حوال رسینگا کہ اودے زوراکی ئٹ گاڑی ئسے ٹی شاغِسہ بیگواہ کننگانے۔
خاہوت نا رد ئٹ عمر جان نا کس تون ہچو ذاتی دشمنی ئس اف نئے کہ خاہوتی دشمنی ارے، او اسہ پُرامن شاری ئس ءِ۔ او تینا بندغ نا آجوئی نا خواست کرینو۔
ایلو کنڈ آن ڈیرہ بگٹی آن رسینگوکا حوال تا رد ئٹ سی ٹی ڈی غلہ و چَڑیا دال نا کاروبار کروک کیہی تاجر آتے دزگیر کرینے۔
جہی مخلوق نا رد ئٹ اوفتان تاوان کن بھاز پیسہ خواہنگ مسس و ہرا پیسہ تننگ کتور اوفتے بیگواہ کننگانے۔
بیگواہ کننگوک آتا چاہنداری گل محمد ولد جمعہ بگٹی، گوڑو ولد بخت علی بگٹی، مرید ولد خدا بخش بگٹی، علی خان ولد عمر بخش بگٹی، گولا ولد لالہان بگٹی، مہندرا بگٹی (جہی ہندو تاجر)، بھلا بگٹی و جاوید ولد عرض محمد بگٹی نا پن تیٹ مسُنے۔
