ہنوکا دے تیٹ پاکستان نا پائتخت اسلام آباد ئٹی اوورسیز پاکستانیز فاؤنڈیشن نا دیوان ئٹی تران کریسہ پاکستانی لشکر نا بھلّا جنرل عاصم منیر دعوی کریسس کہ بلوچستان پاکستان نا تقدیر و اونا پیشانی نا "جھومر” ءِ۔ ولہ بلوچ آجوئی دوست راہشون ایڈوکیٹ رحیم بلوچ دا درشان ئے رد کریسہ پارے کہ اونا دا دعوی دروغ و گمراہ کروک ءِ۔
رحیم بلوچ نا رد ئٹ بلوچستان نہ تو پاکستان نا تقدیر ءِ نئے کہ اونا پیشانی نا "جھومر” ءِ، بلکن اسہ کوزہ مروکو علاقہ ئسے ہراڑے پاکستان ریاستی جبر تا زریعت ئٹ تینا کوزہ ئے برجاء تخانے، و اونا قدرتی وسائل تے ملٹی نیشنل کمپنی تا زریعت ئٹ لُٹنگ نا کوشست کننگ ئٹی ءِ۔
او پارے کہ بلوچ راج پاکستان نا دا نوآبادیاتی قید آن آزاتی کن جہد کننگ ئٹی ءِ و دا جُنز دے پہ دے سوگَو مننگ ئٹی ءِ۔ عاصم منیر تینا تقریر ئٹی بلوچ آزاتی خواہوک آتا کچ ئے بیرہ پانزدہ سد پارے و اوفتا ایسری کن دڑکو تس ولے زمینی گواچن آک جتاء ءُ۔
رحیم بلوچ نا پاننگ اسک کہ عاصم منیر نا دروشم آ ڈھکوک مایوسی، سوختئ و بے سوبی بلوچستان نا حالیت آتا درشانی ئے کیک ہمر کہ بنگلہ دیش ئٹ اشرافیہ نا نو آبادیاتی پالیسیک پاکستان ئے ذلت تسر ہندُن انجام بلوچستان ئٹ بھیرو کننگے۔
او پارے کہ بلوچ راج ئنا جہد و قربانی دا عزم نا گواہی ایتک انتئے کہ بلوچ چائک کہ اوفتا راجی بقا، وقار و خوشحالی بیرہ آزاد بلوچستان ئٹی ممکن ءِ۔
