بی ایل ایف نا ترجمان میجر گہرام بلوچ میڈیا ٹی شنگ کروک تینا بیان ئسیٹی پارے کہ سرمچارک کیچ ئنا ہند تمپ ئٹی ڈیتھ اسکواڈ نا سروک نسیم کوہی و شاپک ئٹی کوزہ گیر پاکستانی لشکر نا چوکی ئے ٹک کریر۔
ترجمان پارے کہ سرمچارک کیچ ئنا ہند گومازی تمپ ئٹی ڈکھکوک حوال تا بنیات آ راجی ڈوہدار و ڈیتھ اسکواڈ نا اہم باسک نسیم کوہی ولد گہرام ئے سُمکاری کرسا خلکر و اونا سلاہ و ایلو مڈی تے ہرفیر۔ نسیم کوہی 13 مارچ 2018 آ بی ایل ایف نا شہید سرمچار کیپٹن جہانگیر عرف جبار ولد حاجی اکبر نا بیگواہی و شہیدی ٹی اوار اسک۔ بیگواہ کننگ نا وخت شہید کیپٹن جہانگیر آ سخت بیدادی کننگاسس و پدا اونا جشوک جون ئے خسنگ مس۔
او پارے کہ پاکستان نا بیرہ نسیم کوہی ئے سرمچار آتا برخلاف کارمرز کرینے بلکہ ملٹری انٹیلیجنس اودے بلوچ ورنا تا زوراکی ئٹ بیگواہی، بیدس عدالت خون و اُرا تیا چھاپہ نا سخت انگا ڈوہ تا زمہ واری تسس۔
اونا پاننگ اس کہ او کوزہ گیر پاکستانی لشکر تون اوار مرسا بلوچ سرمچار آتا برخلاف کیہی لشکر کشی تیٹی ہم اوار مسونے۔ ایم آئی اودے گومازی ٹی ڈیتھ اسکواڈ نا سربراہ کریسس و بھاز بندغ آک اونا بھلنی ٹی بلوچ نا برخلاف کاریم تیٹی اوارءُ۔
او ودیک پارے کہ نسیم کوہی ئے بلوچ سرمچار کیپٹن جہانگیر نا شہیدی تون اوا ایلو بےڈوہ بلوچ ورنا تا شہیدی، بلوچ الس آ زوراکی و جبر، چاگڑدی گندئی تیٹی اوار مننگ و دشمن تاغت آتون اوار مرسا جاسوسی نا وڑ بھلا ڈوہ تا بنیات آ تنظیم نا محکمہ انصاف راجی ڈوہدار پارے۔ اندا بنیات آ او بھلو وخت ئسے آن بی ایل ایف نا ہٹ لسٹ ئٹی اسک ہرادے سرمچارک 17 اپریل 2025 آ انٹیلی جنس نا آپریشن ئٹی خلِسہ اونا ایسر اسکان سر کریر۔
ایلو کاروائی ٹی بی ایل ایف نا سرمچارک 17 اپریل آ نن ئنا 11:30 بجہ غا کیچ ئنا ہند شاپک ئٹی بارگ کوہ آ ساڑی کوزہ گیر پاکستانی لشکر نا چوکی ئے گرنیڈ لانچر ئٹ ٹک کریر ہرا نشانہ غا تمار ہرانا سوب آن کوزہ گیر پاکستانی لشکر ئے جانی و مالی نسخان ہرفوئی تما۔
ترجمان ایسر ئٹ پارے کہ بی ایل ایف دا ہڑتُما جلہو تا زمہ واری ئے ہرفک۔ و کُل ریاستی کمکار تے پائک کہ ریاست نا پاننگ آ بلوچ قوم ئنا برخلاف ڈوہدار آ ہر ہمو بندغ یا ٹولی ئے عبرتیئو سزا تننگ مرو ہرانا اوفک حقدار ءُ۔ و دا قول ئے دوارہ کیک کہ آجو بلوچستان اسکان کوزہ گیر لشکر و اونا کمکار تے ٹک کرسا کرو۔
