بلوچستان نا ضلع کیچ ئٹی پاکستانی لشکر ئے بمب تراک ئٹ ٹک کننگانے۔ ایلو کنڈ آن سبی ٹی لشکر کشی نا وختا پاکستانی لشکر دہ بندغ بیگواہ کرینے۔
حوال تا رد ئٹ بلوچستان نا ضلع سبی نا علاقہ لہڑی نا ہیب ئہ کھیب ئٹ پاکستانی لشکر نا بھلو کچ ئس اینو مُچا دے لشکر کشی ٹی اختہ اس و اُرا اُرا ئے پٹ ئہ پول کننگا۔
سبی آن رسینگوکا حوال تا رد ئٹ پاکستانی لشکر دا وختا اُرا تیا چھاپہ خلک و چھاپہ آتا وختا دہ ئنا کچ بندغ دزگیر کننگ آن گُڈ بیگواہ کرے ہرافتا دائسکان ہچ ڈس اف۔
سبی لہڑی آن زوراکی ئٹ بیگواہ کننگوک بندغ آتا بارو ئٹ دائسکان ودیک حوال رسینگتنے و علاقہ ئٹ لشکر کشی نا سوب آن موبائل نیٹورک و انٹرنیٹ بند ءِ۔
ایلو کنڈ آن حوال رسینگانے کہ ضلع کیچ ئنا علاقہ دشت درچکو ٹی نادرست آ بندغ آک پاکستانی لشکر نا بمب ڈسپوزل اسکواڈ نا پندھ خلوکا کارندہ غاتے ہموتم تراک ئٹ ٹک کریر ہراتم او کسر ئے ساف کننگ ئٹ اختہ اسر۔
جہی حوال تروکا تا رد ئٹ تراک ئٹ کم آن کم اسہ کارندہ ئس مرگ ئنا گواچی مسنے و اِرٹ ٹپی مسنو واہم کوالخواہ تا پارہ غان دا رد ئٹ شابیتی حوال مونا بتنے۔
