ہرا دے آن بلوچستان پیشن نا تاغت آتا دو ئنا شیف آنے ہمو دے آن بلوچ نا زند خوئشی تیان ہورک ءِ۔ کوزہ گیر نا خڑک بلوچ نا حیثیت اسہ مال ئسے آن ہم کم ءِ انتئے کہ خواجہ ئے تینا مال ئنا زند ہم دوست مریک و او اودے ناجوڑی و نہار آتیان رکھِک۔ ولہ کوزہ گیر نا مسخت کوزہ مروک ڈغار آ رہینگوک آ بندغ آتے نیست و نابود کننگ ءِ۔ ہمر کہ سہدار آتے تفنگ مریک ہندا وڑ مظلوم آ راج آتے ہم پابند کننگ مریک و اوفتیان زند ئنا ہر آسراتی پھلنگ مریک۔ بلوچ ہم تینا ڈغار آ خواجہ مننگ آن پد تموک ءِ و کوزہ مروکا راج و قوم آتا لڑ ئٹی ساڑی ءِ۔
دہن انگا حالیت آتیٹی قوم آتیٹی ہندنو مزاحمت کروکو رہبر ودی مریرہ ہرا تینا قوم آتے ایسر مننگ آن رکھنگ کن کوزہ گیر نا مون آ سلیرہ۔ ہموفتے آن اسٹ خواجہ غلام محمد ہم اسّک۔ بلوچ ہر دور ئٹی کوزہ گیر آتا برخلاف مزاحمت کرینے۔ و ہر دور ئنا خواست آتے ہُرِسہ بلوچ رہبر آک تینا کڑد ئے ادا کرینو۔ 1974 ئٹی خواجہ غلام محمد بی ایس او نا بشخ جوڑ مسک۔ قوم پرستی و قومی سیاست ئے ہیل کرے و تینا ثابت قدمی، سوگو انگا جہد، علم و چاننگ نا سوب 1990 ئٹی تنظیم نا چیئرمین گچین کننگ مس۔ 1992 ئٹی او بلوچ نیشنل موومنٹ(بی این ایم) ئٹی اوار مس۔ او وخت آ بی این ایم نا رہبر آتا موقف اس کہ او بلوچستان نا خودمختاری و حق حاکمیت کن جہد کرور انتئے کہ پاکستان اسہ ظالم و کوزہ گیرو ریاست ئس ءِ، ہرا توفک آن بیدس ہچو بولی ئس سرپند مفک ہندا سوب بی این ایم نا پالیسی تیٹی سلاہ بند جہد ہم اوار اس۔ پارٹی ڈھکوک وڑ ئٹ پاکستان نا برخلاف جنگ ئنا تیاری کننگ ئٹی اسک ولہ 1988 ٹی فدا احمد ئے شہید کننگا ہرا خواہسکہ کہ بی این ایم پارلیمانی سیاست نا بشخ مف۔ فدا احمد نا کوش آن پد پارٹی نا مون ہڑسوک آ رہبر آک پارٹی ئے پاکستان نا پارلیمنٹ نا بشخ جوڑ کریر و مزاحمت آن مُر مسُر۔
واجہ غلام محمد بلوچ دا بے توار آ مون ہڑسنگ آن نمن کرے و بی این ایم ئے اونا بنداوی اصول آتے برجاء تخِسہ پارلیمانی سیاست آن تیبہ جتائی نا پڑو و آزات بلوچستان نا آزاتی نا خواست ئے کرے۔ بی این ایم بلوچستان نا ہمو اولیکو جماعت جوڑ مس ہرا پاش وڑ ئٹ آزاتی نا خواست ئے کرے و 2008 نا سیشن ئٹی پارٹی نا آئین آن ” حق خود ارادیت” ئے کشیسہ ساف لوز آتیٹی "آزاتی” نا خواست اوار کننگا۔ خواجہ غلام محمد بلوچ نا کماشی ٹی بی این ایم بلوچ سرمچار آتا مُخ تفی ئے کرے و بلوچ ئے سلاہ بند جہد ئنا سبخ ئے تس، ولہ او تینٹ سلاہ بند الّو۔ دشمن چائسکہ کہ اگہ غلام محمد نا گام تے توننگ متو تو اونا کماشی ٹی بلوچ آک زوت غلامی نا زمزیر آتے پرغور۔ ہندا سوب آن غلام محمد و شیر محمد ئے زوراکی ئٹ دزگیر کرِسہ بیگواہ کننگا۔ آجوئی آن پد ہم او آزاتی نا جنز ئنا رہبر نا وڑ ئٹ مُستی ہِنِسا کرے نئے اونا خیال آک بدل مسُر نہ اونا کڑدار۔
اودے شال تربت و کراچی نا عدالت آتیٹی خوار کننگا۔ 3 اپریل 2009 آ تربت ئٹی بلوچ ریپبلکن پارٹی نا نائب صدر شیر محمد بلوچ و بی این ایم نا لالا منیر بلوچ تون اوار عدالت ئٹ بسُر۔ عدالت پاکستان نا فوج ئنا کنڈ آن خلوک دروغ ئنا دوبہ غاتے وے منِسہ او مُسٹ ئے بے ڈوہ پارے۔ ولہ پاکستان نا فوج اوفتے خواجہ کچکول ایڈوکیٹ نا دفتر آن بیگواہ کرے و مرگاپ نا ہند آ خلک۔ اوفتا جونک 8 اپریل آ خننگار و 9 اپریل آ اوفتے ڈغار نا باہوٹ کننگا۔
مرگاپ نا تدینی بلوچستان ئٹی "خڷ ئہ بِٹ” نا پالیسی نا بناء اسک ہرا اینو اسکان برجاء ءِ و اونا نشانہ بلوچ ئے دوست تخوکاک ءُ۔ غلام محمد بلوچ و اونا سنگت آتے شہید کننگا ولہ مرگاپ اینو اسکان ہم آزاتی کن ملاس ءِ و بلوچستان ئٹی آزاتی نا جنز جوش ئٹ برجاء ءِ۔
