بلوچستان نیشنل پارٹی نا کماش سردار اختر مینگل مستونگ ئٹی پریس کانفرنس کرسا پارے کہ اگہ ننا برانز بےسوب مسنے گُڑا لانگ مارچ نا کسر ئے توننگ کن کسر تِہ انتئے بند کرینو؟ پاکستانی لشکر نا ساڑی مننگ، کنٹینر خلِسہ کسر تِہ بند کننگ اوفتا دعویٰ غاتِہ تینٹ دروغ ثابت کیک۔ نن پیشن نا تاغت افن، نن لسّو بندغ اُن و تینا حق کن کسر تیا پیشتمانو۔
او پارے کہ شال تون اوار بلوچستان نا جتا علاقہ غاتیان بی این پی نا کیہی باسک و سروک آتِہ دزگیر کننگانے، ایف سی برانزی تیا مون پہ مون سمکاری کرینے، ہرا نا سوب آن چھار بندغ ٹپی مسنو، ہرافتیٹ اِرٹ نا حالیت بھاز خراب ءِ۔ چُنا نیاڑی تیا لٹ کُٹ و اُرا تیٹ پیہِسہ کاروائی تا حوال ہم ارے۔
بی این پی نا کماش پارے کہ نن تون کس ہیت کننگ اف، حکومت، اسٹیبلشمنٹ و بیوروکریسی تین پہ تین ہیت کننگ ءُ۔
اختر مینگل پارے کہ اگہ چُنا پٹیئا تِہ دزگیر کننگ کیرہ گُڑا کنے دزگیر کننگ آ انتئے نت تِہ پدی تورینو؟ ای تینٹ پاریسُٹ کہ دا چُنا پٹیئا تِہ یلہ کبو و اگہ بی این پی نا سروک آتہ دزگیر کیرے تو کبو، ولے وزیر آتا پاننگ اس کہ او ننے دزگیر کننگ کپسہ۔
او ودیک پارے کہ حکومت اگہ خواہے تو دا ویل ہیت ئٹ ایسر مننگ کیک، ولے اگہ دزگیری و زوراکی کننگا تو برانز پین ترند مرو۔ اختر مینگل ساڑی آ حکومت نا کاریم تِہ سیاسی جبر و بے جمہوری پارِسہ پارے کہ اگہ سیاستدان آتِہ سیاسی اصول آتیا سیاست کننگ التوس تو ڈیہہ تباہی نا کنڈ آ ہنو۔
اختر مینگل پارے کہ اینو تیبہ بلوچستان ئٹی بی این پی نا کال آ سرسوب شٹر ڈاؤن ہڑتال ثابت کرے کہ الس ننتون اوار ءِ، و دا کلہو ءِ ہمو کُل تاغت آتیکن ہرا السی توار ئے توننگ خواہرہ۔
سردار اختر مینگل بلوچ یکجہتی کمیٹی نا زالبول باسک ئنا شال آن دزگیری و بیگواہی ئے شیف خلِسہ پارے کہ دننگا تدینیک حالیت آتِہ پین خرابی نا کُنڈ آ درور۔ گُلزادی بلوچ نا شال آن بیگواہی نا حوال آن بھاز دَکہ لگا ننے، دننگا تدینیک بندغی حق آتا سخت لتاڑ و انصاف نا مون آ چپلہ ئس ءِ۔
او ودیک پارے کہ سوج بش مریک کہ آخر کوالخواک انت کلہو تننگ خواہرہ ہراتم او جائز آ توار تِہ بِننگ نا جاگہ غا اوفتّہ توننگ نا کوشست کیرہ۔ دننگا گھامک بیرہ بے باوری ئے ودفِرہ، حالیت آک مُست آن وس آن پیشن ءُ و دا وڑ ئنا کاریم تیان پین خراب مرور۔
