بلوچستان نیشنل پارٹی نا لانگ مارچ کلات ئٹ سر مننگ آن گڈ داسا شال آ رادہ مسنے، سردار اختر مینگل دا وختا تران کرسا پارے کہ نن کلات ئٹ سرمسونن داڑان بیدس کہ ننا مونا ہڑاند تخنگا۔
او پارے کہ ننا مونا ہمو تاغت آک ہڑاند تخانو ہرا پُرامن برانز آتیان خُلیس نا گواچی ءُ ہرا بلوچ الس ئنا توار ئے توننگ کن بےجارات ءُ۔ موبائل نیٹ ورکس آک تیبہ کننگانو ننا کسر تیا جتا جاگہ غا تیا کنٹینر تخنگا خاص وڑ ئٹ باغبانہ و توتک ئٹ۔
سردار اختر پارے کہ ننے حوال رسینگانے کہ شال ئٹ تیبہ لاک ڈاؤن ءِ و لک پاس نا ہڑتوم پارہ غان کنٹینرز تخِسہ کسر ئے بند کننگانے۔ ای بلوچستان نا دلیر آ الس آن خواست کیوہ کہ او ہڑتوم پارہ غان لک پاس آ مُچ مریر و دنیا ئے بلوچ قوم ئنا سیوتی و تاغت ئے نشان ایتر۔
او پارے کہ لانگ مارچ ئٹ اوار بندغ آتیان کنا خواست ءِ کہ او ہر دروشم ئٹ پُرامن مریر، چاہے ننے ہخس خار تننگ نا کوشست کننگ مرے۔ ننا تاغت ننا نظم و ضبط، ننا سیوتی و ننا مسخت ئٹ ءِ۔
بلوچستان نیشنل پارٹی نا سروک سردار اختر جان مینگل پڑو تس کہ لانگ مارچ ئنا گُڈیکو مزل ریلوے ہاکی چوک مرو ہراڑے برانزیک تینا آئینی و جمہوری حق آتیکن تولوک برانز کرور۔
او پارے کہ اگہ ننا خواست آک پورو متور گُڑا نن ائید ئنا نماز ہم ہاکی چوک آ خوانون۔
