تربت نا علاقہ بہمن و ڈنک آن زوراکی ئٹ بیگواہ کننگوک ورنا تا آجو مفننگ نا برخلاف جدگال ڈن آ برانز برجاء۔
شابیتی حوال تا رد ئٹ بہمن و ڈنک آن بیگواہ کننگوک نعیم بشیر، اسماعیل و نعمان رفیق نا آجوئی کن اوفتا خاہوت آک جہی مخلوق تون اوار تربت ئٹی جدگال ڈن (ڈی بلوچ پوائنٹ) آ ایم 8 کسر ئے برانز کرسا بند کرینو۔
خاہوت آتا پاننگ ءِ کہ نن داکان مُست ہم برانز کرین ولے ضلعی انتظامیہ نا پارہ غان ننے باور تننگ مس کہ اوفتِہ یلہ کننگو و ننا برانز ئے ایسر کرفیر۔ مسکوہی ڈی سی ہر مُسہ ورنا تا آجوئی کن کیہی وار ننتو قول کرے ولے او ورناک آجو کننگتور اندا سوب آن نن بیوس مرِسہ دوارہ روچئی نا مبارک آ تُو ئٹ کسر تیا پیشتمِسہ برانز کننگ اُن۔
