"بلوچ سٹودنٹس آرگنائزیشن (آزاد) نا مسکوہی چیئرمین زاہد بلوچ و جونیئر جوائنٹ سیکریٹری اسد بلوچ یانزدہ سال آن بیگواہ ءُ۔ چیئرمین زاہد بلوچ نا خاہوت ئے اشتماعی سزا نا گواچی کننگ مننگ ئٹی ءِ۔ جہانی ادارہ غاتِہ بندغی حق آتا لتاڑ نا برخلاف ننتو سلنگ نا گرج ءِ۔”
دا خیال آتا درشانی ئے بی این ایم نا جارکش بی ایس او آزاد نا مسکوہی چیئرمین زاہد بلوچ و جونیئر جوائنٹ سیکریٹری اسد بلوچ نا یانزدہ سال آن بیگواہی و اندا زوت ئٹ زاہد بلوچ نا خاہوت تون مروک است ئے ہسون کروک تدینی آ تینا بیان ئٹی کرے۔
ترجمان پارے کہ زاہد بلوچ ئے پاکستانی لشکر 18 مارچ 2014 آ زوراکی ئٹ بیگواہ کرِسہ تینا ڈھکوک زندان تیٹی تخانے۔ دا کاروائی ریاست نا سخت انگا دہشت گردی و اشتماعی سزا نا چرجوئی نا بشخ ءِ ہرانا بلوچ الس کیہی سال آن گواچی ءِ۔
ترجمان زاہد بلوچ نا ایلم شاہ جہان بلوچ نا شہیدی آ گپ کرِسہ پارے کہ دا اشتماعی سزا نا گندہ غا مثیل ءِ۔ اودے 14 مارچ آ نال ئٹی پاکستان نا جوڑ کروک ڈیتھ اسکواڈ نا دو آن بے رحمی ئٹ کھسفِنگا۔ او تینا اُرا نا اسٹ آ آسرہ اسک و تینا علاقہ ٹی تینا جند ئنا پُہریا ٹی آختہ اسک۔
او ودیک پارے کہ اونا چنکا ایلم سلیم بابل بی این ایم نا اسہ کاریمیئو باسک ئس ءِ، اودے تینا علاقہ ئے النگ آ بیوس کرینو و او داسہ برطانیہ ٹی باہوٹ مننگ کن کسر پٹنگ ءِ، جہان ئے پام تننگ خواہک کہ دا ظلم و زوراکی و ریاست نا پالیسی تا دو آن خاہوت بے اُرا و اسٹ ایلو آن جتا کننگ مننگ ئٹی ءِ۔
او پارے کہ زوراکی ئٹ بیگواہ بلوچ خوانندہ راہشون آتا آجوئی کن بھلو کچ ئسیٹ برانز و بین برانز کننگا۔ ہرا اوفتا آجوئی نا قول اتیا آ ایسر مسر ولے او قول آتیا اینو اسکان عمل کننگ متو۔ اینو او یانزدہ سال آن پاکستان نا ڈھکوک زندان تیٹی بیدادی سگنگ ءُ۔ اوفتِہ انصاف تننگ و زوراکی نا بیگواہی آن آجو کننگ نا جاگہ غا زاہد بلوچ نا خاہوت نا اسٹ انگا آسرہ شاہ جہان ئے کھسفنگا ہرا اونا خاہوت و بلوچ قوم آ برجاء بیدادی و ظلم و زوراکی نا سوگو آ پیدواری ءِ۔
نن جہانی ادارہ غاتیان خواست کینہ کہ شاہ جہان نا خون و زاہد بلوچ و اسد بلوچ نا یانزدہ سال آن بیگواہی تون اوار پین ہزار آ بیگواہی تا پٹ ئہ پول کننگ مرے و پاکستان آن اونا دا ظلم و بیدادی تیا ورندی ہلنگ مرے۔ جہانی کہول بندغی حق آتا سخت انگا لتاڑ نا برخلاف ننتو اوار سلِہ۔
