شال ئٹی بولان میڈیکل کالج (بی ایم سی) نا رہینگ جاہ (ہاسٹل) تا پولیس و فوجی کارندہ غاتا کوزہ نا برخلاف و دزگیر مروک خوانندہ غاتا آجوئی کن خوانندہ غاتا برانز چھارمیکو دے ہم برجاء ءِ، زوراک آ یخ ئٹی ہم خوانندہ غاتا بھلو کچ ئس برانز ئٹی بشخ ہلکنے۔
خوانندہ غاک پولیس نا ساڑی آ زوراکی آ نغد کاری کرسہ پاریر کہ رہینگ جاہ تا چھاپہ خلّنگانے، بھازا دزگیر مروکا خوانندہ غاک ٹھپی مسّنو یا تُسینگانُو۔ خوانندہ تنظیم آک دا زوراکی تہ بلوچ ورنا تہ خواننگ ئٹی پد بٹنگ نا چم پاریر۔
پولیس نا دا گام ئنا برخلاف خوانندہ تنظیم آک برانز بناء کرسہ حکومت و انتظامیہ آ نغد کاری کرینُو۔ خوانندہ غاتا پاننگ ءِ کہ دہنی ئٹ بلوچ ورناتہ خواننگ آن مُر کننگ نا کوشست کننگک۔
اسہ برانزی خوانندہ ئس پارے کہ ” ننا اسٹّا ڈوہ خواننگ نا شونْق ءِ، ریاست ننے خواننگ آن مُر کننگ خواہک۔
خوانندہ رہشونک پولیس نا زوراکی ئے بلوچ و پشتون خوانندہ غاتا نیام ئٹی اختلاف ودی کننگ نا چم ئس پارینُو۔ اوفتا پاننگ ءِ کہ دا گام خواننگ نا ادارہ غاتہ فوجی مسخت کن کاریم ئٹی ہتنگ نا کوشست ئس ءِ۔
او پاریر کہ کالج و یونیورسٹی تہ فوجی اڈہ جوڑنگ نا برخلاف جہد کرون۔ ہندن اوفتا خواست آک اگہ منّنگتوس تو مُچ بلوچستان ئٹی برانز مرو، و پاریر کہ رہینگ جاہ و کالج آتا ولدا ملنگنگ و ہلّنگوکا خوانندہ غاتا آجوئی اسکان برانز برجاء مرو۔
