فورسز کوالخواک غٹ چنکا بھلا جنکشن و ریلوے اسٹیشن تیٹ تینا کارندہ خلکنو، اندن کوئٹہ نا غٹ اسپتال تیٹ ڈاکٹر، نرس و ایلو کاریمی آتہ ساڑی مننگ نا پنت تننگانے۔
کوئٹہ آن رسینگوکا حوال تا رد ئٹ شار ئنا بنجائی ریلوے اسٹیشن ئے پاکستانی لشکر نا بھلو کچ ئس گھیرہ کرینے، سکیورٹی نا سخت بست و بند کننگانے۔
فورسز کارندہ غاک کس ئے ریلوے اسٹیشن نا تہٹی پیہنگ نا موکل تننگ افس۔
کوئٹہ نا ریلوے اسٹیشن نا پیشن جعفر ایکسپریس نا بندی تا سیال آک بھلو کچ ئسیٹی مچ مسنو و تینا بندغ آتا بارو ئٹ معلومداری دوئی کننگ نا کوشست کننگ ء ولے اوفتہ ہچو معلومداری رسینگ اف۔
اندن پاکستانی لشکر سبی جنکشن ئے ہم گھیرہ کرینے و السی ہن ئہ بر نا موکل تننگ اف۔ اندن علاقہ ٹی چنکا بھلا اسٹیشن تہ ہم پاکستانی لشکر گھیرہ کرینے۔
ریلورے ٹی کاریم کروک اسہ بندغ ئس بی بی سی تون ہیت کرسا پارینے کہ داڑے بھلو کچ ئسیٹی تابوت ہتنگانے۔
اندن کوئٹہ ٹی محمکہ صحت نا کنڈ آن غٹ اسپتال تا ڈاکٹر و ایلو کاریمی آتہ پنت تننگانے کہ او 24 ساہت اسپتال تیٹ ساڑی مریر۔
