حوال تا رد ئٹ قلات شار آن پاکستانی لشکر 35 نا کچ بندغ دزگیر کننگ آن گڈ بیگواہ کرینے، اندن گوادر آن اسہ بیگواہو بندغ ئسے نا ہشنگوکو جون ئس خننگانے۔
بلوچ یکجہتی کمیٹی تینا شنگ کروک بیان ئٹ پارینے کہ قلات شار و ہیب ئہ کھیب ئٹ ریاستی قہر برجاء ءِ، رسینگوکا حوال تا رد ئٹ قلات شار ئے تیبہ گھیرہ کرسا اُرا اُرا ٹی چھاپہ خلنگ مننگ ءِ و دا وختا دائسکان 35 نا کچ بندغ دزگیر کننگ آن گڈ بیگواہ کننگانے ہرافتیٹ اسٹ خدا بخش نا مار اشفاق بلوچ نا پن ئٹ درست مسنے ہرادے درے نن قلات ئٹ اونا اُراغان بیگواہ کننگانے۔
بی وائی سی نا بیان ئٹ پاننگانے کہ اشفاق احمد پنجاب یونیورسٹی آن اندا زوت ئٹ فارغ مسس و اونا اُرا نا چادر و چھار دیوالی نا شرف ئے لتاڑِسہ اودے زوراکی ئٹ بیگواہ کننگانے و اُرا نا ایلو بندغ آتہ، پالْ کنوکا چنا تہ ہم بیدادی نا گواچی کرسا قران پاک نا ہم بےشرفی ئے کننگانے و خاہوت ئٹ بیم و خلیس تالان کننگ کن اوفتیا سمکاری ہم کننگانے۔
بیان ئٹ پاننگا کہ بلوچ یکجہتی کمیٹی اشفاق احمد ولد خدا بخش تون اوار ایلو غٹ ئنا سرسلامت آجوئی نا خواست کیک۔
ایلو کنڈ آن بلوچستان نا دریابی شار گوادر نا تحصیل جیوانی نا علاقہ روبار آن اسہ بندغ ئسے نا ہشنگوکو جون ئس خننگانے۔
حوال تا رد ئٹ جون ئنا کاٹم ہشنگوک اف ولے اونا تیبہ بدن ہشنگانے۔
جون عبدلحمید نا مار شاہد نا پن ئٹ درست مسنے۔
جہی مخلوق نا رد ئٹ پن کروک بندغ ئے پاکستانی لشکر 26 جولائی 2023 آ گوادر آن بیگواہ کریسس۔ پدان 13 ستمبر 2023 آ گوادر پولیس نا حوالہ کننگاسس و اینو اونا جون خننگانے۔
