نوشت: سُمعیہ بلوچ
زرمبش نوشتانک
اگہ نن زالبول تا ہیت ءِ کین گُڑا ننا ملی ٹی کُل آن مُست اسہ گڑا ئس پیری کیک کہ انت زالبول آک ہم نرینہ غا تا ہمسر مننگ کیرہ؟ ننا چاگڑد ئٹی زالبول تہ بیرہ اُرا اسکان توننگ، اسہ مزور ئس سرپند مننگ و تینا اُرا نا عزت نا شغان ءِ ترسہ اوفتہ اُرا ٹی بندی کننگانے۔ ولے نن دا چاگڑدی، مالی و سیاسی شونداری ءِ گیرام کرینُن ہرا ننے بیرہ زالبول تا سُوب آن دوئی مریک، نن اگہ مُست ئنا تہذیب آتیا اسہ نظر ئس شاغن گُڑا اوڑے ننے زالبول تا شونداری خننگ کن رسینگک۔
جہان نا بنداتی تہذیب آتیان اسٹ ئس مہرگڑھ ہرا 11000 سال متکن ءِ، اوڑے زالبول آتہ خدا تکنگ مسکہ۔ نہ کہ بیرہ مہرگڑھ، بلکن یونان، مصر، ایران و عراق نا تہذیب آتیٹ ہم زالبول آتہ خدا سرپند مسرہ۔ زالبول آک اُرا نا رہبر اسر۔
مست ئنا وخت ئٹی ہرا تم نرینہ غاک اُرا غان پیشن شکار کن ہنارہ گڑا کیہی تُو ارا غان پیشن مسرہ و کیہی تو آن گُڈّ اُرا غا بسُرہ، ہمو وخت زالبول آتہ اُرا نا زمہ واریک تننگار، زالبول آک تینا چُنا تہ سنبھالارہ و ناجوڑ آتا خیالداری ءِ ہم کریرہ، ہرا نا سُوب آن زالبول آک دارو درمان ئٹ ہم تینا کڑد ءِ سر تسر، اگہ نن دا پان کہ درمان نا استاذ آک ہم زالبول آکو گُڑا دا ہم غلط مننگ کپک۔ داڑان بیدس اگہ نن زرعی انقلاب نا ہیت ءِ کین گڑا او تا استاذ آک ہم زالبول آک ءُ۔
مست ئنا دور آ مدر سری نظام ترند اس، ہراڑے زالبول اُرا نا راھشون مسکہ، ولے مدان مدان آ سرداری نظام مدرسری نظام ءِ چٹھفسہ پدرسری نظام ءِ مونا ایس و زالبول ءِ اُرا نا چاردیوالی ٹی بند کننگا۔ دا سوب قدرت نا پارہ غان متو ولے ریاست نا وجود نا سوب آن مس۔ ولے داسہ نا دور ئٹ زالبول آک پدا تینا ہمو دروشم ئٹ نظر برسہ ءُ وا ہمو جہد ئٹ تیوہ جہان ئٹی شون ئس نظر بننگ ءِ۔
زالبول آک اینو ہم جہان ئٹ بھاز گڑا دوئی کرینو، داڑان بیدس ہم بندغ آک زالبول آتہ نزور سرپند مریرہ، اوفتا پاننگ ءِ کہ زالبول آک جسمانی وڑئٹ نزور ءُ ولے دا ردی ءِ مُر کننگ کن زالبول تا دیہاڑ ئٹی ہنوئی تمک، کہ زالبول آک ارا وڑ جنگ آتا بشخ مسنو و اندنو قربانی تُسنو ہرا وڑ شاید نرینہ غاک ہم تننگ کپس، اندا سوب آن ای امو جنگ آتہ مونا اتیوہ ہرا تا سرسوبی زالبول آتا سوب آن مسُنے۔
اگہ نن سرسوب آ جنز و جنگ آتیا چمشانک ئس شاغن گڑا اوفتیٹ ہم زالبول آتا کڑد نظر بریک، اندا بابت ئٹ عظیم انگا گوریلا کمانڈر چی گویرا پائک کہ “او انقلاب سرسوب مننگ کپک ہرا ٹی زالبول آتا کڑد مف۔”
زالبول آتا گپ مرے گڑا اوفک بھاز آ جنگ آتیٹی بھلو قربانی تسنو، امو زالبول آتا کسہ غاک ویتنام نا سرزمین ئٹ جوان خننگ ئٹی بریرہ، امو سرزمین ئٹی ہرا وڑ کہ نرینہ غاک تینا زند ءِ نَدْر کریرہ امو وڑ ویتنام نا زالبول آک ہم پیشن نا بروک آ جلہو کروک آتا برخلاف تینا زند ئنا قربانی ءِ تُسرہ۔ 1943 ئٹ ہرا وخت آ چین ویتنامی تہ شکست تس و ویتنام آ کوزہ کرے گڑا اوفتا زالبول آتہ غلامی نا زند برداشت متو، اوفک جھل تیا تار خلسہ خودکشی کریرہ۔ مسکوہی جنگ آتا سوب ویتنام آ پوسکنو سہب ئس ٹک ایتک و زالبول آتا قربانی نا سوب آن او جہان ئٹ اسہ آجو ءُ ڈیہہ ئس مریک۔
اگہ نن چین ئنا انقلاب آ نظر ئس شاغن گڑا اوڑے ہم زالبول آتا کڑد ننے نظر بریک۔ چین ئنا اندا زالبول تیان اسہ زالبول ئس قیوجن پینیئو نیاڑی ئس ہم ارے ہرا چینی زالبول تا تربیت ءِ کرے۔ قیوجن آن بیدس ہم چین ئٹی پین دنو زالبول بھاز ءِ ہرافک انقلابِ چین کن بے کچ قربانی تسر، ہرا ٹی اسہ پن ئس زیلن نا ہم ارے۔ اندا اڑتما زالبول آک اسہ سلہہ بند لشکر ئس ہم جوڑ کریر ہرا نا راہشونی ءِ زیلن کریکہ، چینی زالبول تا بھاز انگا قربانی تا سُوب آن چین 1949ء ئٹی اسہ آجو ءُ سوشلسٹ ریاست ئس جوڑ مس۔
اندا وڑ اگہ نن کوریا نا جہد ءِ اُرِن گڑا اوٹی ہم زالبول تا اسہ بھاز بھلو قربانی ئس نظر بریک، ہراڑے زالبول آک بیرہ سلاہ بند جہد ئنا بشخ الور بلکن اوڑے پین ہم بھاز قربانی تُسرہ، دنکہ خوراک اسہ جاہ کننگ و موبالائزیشن نا کاریم ءِ ہم کننگ اسر۔
اگہ نن فرانس نا جون آف آرک نا ہیت ءِ کین گڑا اوڑے دا عظیم انگا زالبول ءِ، ہرا ورناہی ٹی فرانس نا آجو مننگ کن انگریز آتا برخلاف سلہہ بند جہد کرے و تینا فکر و عمل آن راج ئنا ایلو بندغ آتہ جہد کن سرپند کرے۔ 30 مئی 1454ء آ جون آف آرک ئنا ذی آ اسہ بھلو الزام ئس خلکُر و اودے 19 سال نا سن ئٹ کھسفیر، ولے تینا مرگ آن مست او تینا راج ئٹی آجوئی نا اسہ روح ئس ودی کریسس ہرا نا سوب آن فرانس انگریز آتان آجو مس۔ جون آف آرک نا مرگ آن اِرا سال پد فرانس اودے بےڈوہ پارسہ شہیدی نا درجہ ءِ تس و اینو ہم اودے فرانس ئٹی ہیرو و راجی علامت ئس تکرہ۔
ہرا وخت ہندوستان نا دیہاڑ ئٹ نظر شاغن گُڑا اموڑے ہم زالبول اسہ مثالیئو کڑد ئسیٹی خننگ بریک۔ امو عظیم انگا زالبول تیا رانی لکشمی بھائی و رانی ویلونچیار وڑو نا دروشم ئٹ بریرہ، رانی لکشمی بائی فوج ئنا راھشونی ءِ کریکہ، اونا دلیر انگا کڑدار تحریک ءِ اسہ پوسکنو سہب ئس بشخا، اونا لشکر ئٹ اسہ نیاڑی ئس اسکہ ہرا دے جہان کمانڈر کوہلی نا پن ئٹ یاد کیک، ہرا انگریز نا برخلاف خودکش جہلو ئس کریسس، اندا جہان ئٹ اولیکو خودکش جلہو ئس ہرادے کمانڈر کوہلی برطانوی لشکر نا برخلاف کرے۔ ایلو اندا قربانی مستی پین دروشم ئٹ مونا بس و رانی ویلیو نیچار انگریز لشکر آ جلہو ءِ بناء کرے۔ شیو کنگئی نا دا جنگ ئٹ ہرا 1780ء ئٹی جنگ کروک آ رانی اسہ جتائو تاریخ ئس جوڑ مس، انگریز ءِ سلاہ بٹنگ آ بیوس کرے و انگریز بے سوبی ءِ قبول کرسہ شیوگنگی ءِ دوارہ رانی نا حوالہ ئٹ کرے۔
اندن اگہ نن فلسطین نا عظیم انگا ہیرو لیلہ نا ہیت ءِ کین گڑا او نہ بیرہ فلسطین ئٹی مشہور ءِ بلکن تیوہ جہان ئٹ ہراڑے ہم آزاتی نا جنز برجاء اموڑے دانا کسہ غاک درشان مریرہ۔ لیلہ خالد فلسطینی ریاست نا آجو مننگ کن جہد ئٹ اسہ بھلو گوریلا راھشون ئسے نا کڑد ءِ ادا کرینے۔ لیلہ خالد ءِ اندا شون ہم ملا کہ او اولیکو زالبول اسک ارا تینا خواست آتیکن جہان ئٹ اسہ جہاز ئس ہائی جیک کرے ہرا لیلہ خالد نا شون ئکن بنداوی سوب جوڑ مس۔ لیلہ خالد تیوہ جہان نا راج آتیکن اسہ رول ماڈل ئس جوڑمس۔
داڑان بیدس الجزائر امو ریاست اس ہراڑے فرانسسی کوزہ 132 سال اسکان برجاء اس۔
دا کوزہ نا برخلاف اوڑے بھاز آ جنز آک ہم بناء مسر۔
فرانسس فینن تینا کتاب “سامراج نا مرگ” ئٹی نوشتہ کرینے کہ دا امو وخت اسک، ہراتم الجزائر نا زالبول آک بیدس پڑدہ آن اُرا غان پیش تمتورہ، داڑے اسکان کہ او تینا نرینہ غا تا مونا ریڈیو ہم بننگ کتویرہ۔ ولے اسہ وخت ئس اندنو ہم بس کہ جمیلہ بوحیرد پینیئو زالبول ئس تحریک تون اوار مس۔ جمیلہ اِرا وار دژمن نا دو آن دزگیر مس، اولیکو وار 1957 ئٹی ہرا وخت او اسہ بھاز بھلو برانز ئسے نا تیاری ءِ کننگ ئس۔ 1957ء ئٹی ہرا وخت الجزائر نا جنگ آزاتی تُرندی ٹی اس جمیلہ اسہ وار ولدا دزگیر مس، دا وار اودے بھاز جنسی و جسمانی بیدادی نا گواچی کننگا۔ پنچ سال زندان ئٹ بند مننگ آن پد 1962ء ئٹی یلہ کننگا، او انداخس تکڑہ و فکری ءُ زالبول ئس اسکہ داخس سخت جنسی ءُ جسمانی بیدادی تیان پد ہم مَش ئنا وڑ سوگو اس۔ دژمن نا زندان آن یلہ مننگ آن پد جمیلہ آن سوج کننگا کہ نی دا کُل ءِ امر سگھاسہ، جمیلہ ورندی ترسہ پارے کہ او وخت ای تینا بدن آن پیشن مسوٹہ و دا بیدادی تہ خناٹہ گڑا سوچھاٹہ کہ دا کنے آ نہ بلکن پین گڑا ئسے نا ذی آ مننگ ءُ، او بیدادی کرسہ کرسہ ماندہ مسُرہ ولے کنے ہچ ہم سماہ تمتوکہ۔
جمیلہ و الیو الجزائری زالبول تا آزاتی نا جہد ئٹی اوار مننگ نا سوب آن 23 جولائی 1962 ئٹی الجزائر جہان ئٹ اسہ آجو ءُ ڈیہہ ئسے نا وڑ ئٹ سرسوب مس۔
اندا وڑ اگہ نن کیوبا نا آزاتی نا جنز ئنا ہیت ءِ کین گڑا اوڑے ہم ننے زالبول تا بھاز آ قربانیک نظر بریرہ۔ آجو مننگ کن ہرا وڑ نرینہ آک جہد کریر امو وڑ زالبول آک ہم قربانی تننگ آن پدی متویرہ۔ زالبول آک جنگل، مش و گیابان ئٹی دژمن تون مون تسرہ، گوریلا کمانڈر چی گویرا تینا کتاب، “کیوبا کی یادیں” ئٹی لکھانے کہ ہرا کیمپ ئٹ نرینہ آک آجوئی نا جنگ ئٹ قربان مننگ کن تیار اسر، اندُن اموڑے زالبول آک ہم ساڑی اسر، و زالبول آک ہم نرینہ غا تتون ہم کوپہ اسر۔
داڑان گیشتر اگہ نن کرد جنز ئٹی نظر ئس شاغن گُڑا اوڑے ہم زالبول آتا اسہ بھلو قربانی ئس نظر بریک۔ کردش زالبول آک زیبائی تون اوار دلیر ہم اریر، کردش زالبول آک مدام تینا دژمن ءِ ترندو ورندی ترسہ کرینو، اسہ رپورٹ ئسے نا رد ئٹ کرد جنز ئٹی نرینہ و زالبول آتا کچ بھاز زیات ءُ۔ کرد زالبول آک مدام دژمن آ فدائی اُرش ہم کرینو و داسہ ہم کرد جنز ئٹی بھاز بھلو کچ ئسیٹی فدائی زالبول ساڑی ارے۔ ہرا ہر وخت دژمن آ جلہو کننگ کن تیار ءُ۔ اندا زالبول تا سوب آن کرد تحریک جہان ئٹ اسہ گچینو جنز ئس پاننگک۔
اگہ نن بلوچ خطہ ئٹ مروکا جنگ ئٹ زالبول تیا نظر شاغن گُڑا زالبول تا بھاز آ قربانیک نظر بریرہ۔ اوفتیان اسٹ ئس گل بی بی ءِ۔ دا امو وخت ئنا ہیت ئس ءِ کہ ہراتم بلوچستان نا سیم ءُ ویل آتا بشخ و بانٹ مننگ اسکہ، ہرا “گولڈسمتھ لائن” نا پن ئٹ چاننگک۔ اندا بشخ و بانٹ نا برخلاف گل بی بی جنرل ڈائر کون آ ظالم تتون مون تس و دلیری ئٹ جنگ کرے۔ جنرل ڈائر تینٹ گل بی بی بی نا سفت ءِ کیک و تینا کتاب “ریڈرز آف دی سرحد” ہرادے، بلوچستان آ چھاپہ خلنگ و گوریلا جنگ آتا پن ئٹ گل خان نصیر اردو ئٹ مٹ کیک او داٹی نوشتہ کیک کہ گل بی بی نا وڑ زیبا، دلیر و ہوشارو زالبول تینا زند ئٹی اسل ہم خنتنوٹ۔
بلوچستان نا دلیر و شیرزال آ زالبول تیٹ مائی بیبو کون آ زالبول تا کسہ غاک ہم ساڑی اریر۔ مائی بیبو خان قلات میر احمد خانِ اول نا ایڑ اس۔ ہرا وخت میر احمد یار خان ءِ باروزئی تا برخلاف شانزدمیکو جنگ ئٹ بےسوب مس گڑا امو جنگ آن پد مائی بیبو تینا ایلم تون اوار جنگ ئنا بشخ جوڑ مس و اسہ وار ڈھاڈر نا ہند آ دژمن آ جلہو کرے۔ مائی بیبو اندا جنگ ئٹ بھاز دلیری ئٹ دژمن تو مون ترسہ جنگ کرے وجنگ ئنا پڑ آ تینا دژمن ءِ ٹمبہ کرسہ پدا اندا جنگ ئٹ شہید مس۔ اونا شہیدی آن پد باروزئیک نزور مسر و مائی بیبو نا ایلم، خان قلات دوارہ جلہو کرسا سرسوب مس۔
اندن اگہ نن ودیک بلوچستان نا سرزمین ئٹ آجوئی نا جنز آتیا نظر شاغن گُڑا ننے اموڈے ہم زالبول تا قربانیک بھاز خننگ کن رسینگرہ۔ دن کہ بانک کریمہ بلوچ، ہرا سیاسی تلہ غا بلوچ راج کن جہد کرے۔ او “بی ایس او آزاد” نا سْیاسی تنظیم نا تلہ غان تینا جہد ءِ بناء کرے۔ او مُسہ سال اسکان بی ایس او آزاد نا سروک ہم مس۔ ولے کوزہ گیر ریاست اوڑکن بلوچستان نا سر زمین ءِ تنک کرے ہرا نا سوب آن او پیشن ڈیہہ آ ہنا۔ ولے اموڑے ہم دا شیرزال آ زالبول تینا جہد ءِ برجاء تخا۔ ہراتم کوزہ گیر ریاست دا ہم سگھنگ کتو گڑا او بانک ء کینڈا نا شار ٹورنٹو ٹی شہید کرے۔ بانک کریمہ نا شہیدت آن گڈّ بلوچ زالبول تیٹی اسہ جوزہ ئس ودی مس و اوفک سیاسی و سلہہ بند جہد ئٹ اوار مننگ ءِ بناء کریر۔ بانک کریمہ نا شہیدی آن گڈ بانک ماہ رنگ و بانک سمی نا دروشم ئٹ سیاسی راھشون ودی مس۔
اندن بانک کریمہ نا شہیدی سلہہ بند جہد ئٹی فدائی شاری، فدائی سُمعیہ، و فدائی ماہل ودی کرے ہرا تینا ڈیہہ ئنا رکھ ئکن تینا ہنین آ زند آتہ نَدر کریر۔ اندن ہزار آ نیاڑیک اینو سلہہ بند جہد ئٹ اوار مننگ ءُ و لکھ آ بلوچ زالبول آک سیاسی جہد کننگ ءُ۔
دا تیوہ قربانی تیان پد ہم نن زالبول آتہ نزور سرپند مرینہ و زالبول آتہ برابری تننگ کپنہ، امو ہند ءِ تننگ کپنہ ہرادے دا وخت ئٹ نرینہ غاتہ تننگ ان، گڑا دا ننا غٹ آن بھلا ردی ءِ۔ اگہ غلامی آن ساڑ و جہان ئٹ شونداری خواہسہ گڑا زالبول ئہ نرینہ نا نیام ئٹ فرخ ءِ مُر خسّہ، زالبول آک اسہ قوم ئسے نا ہمو عظیم آ میراث آکو ہرا قوم آتہ سیاسی، چاگڑدی و سماجی زند تدیفنگ نا ہنر ءِ ہیل تسونو۔ بقول نیپولین کہ، “نی کنے اسہ گچینو لُمہ ئس ایت گڑا ای نے اسہ گچینو راج ئس ایتوہ۔”
