زورئٹ بیگواہی تا برخلاف و بےقانودی کھسفنگوک بلوچ آتِہ انصاف تننگ کن وائس فار بلوچ مسنگ پرسنز نا بین برانزی گدان ئے اینو 5710 دے پورو مس۔
وی بی ایم پی نا وائس چیئرمین ماما قدیر بلوچ اواری نا درشانی کن بروکا تون تران کرسہ پارے کہ اینو بلوچستان ئٹی بلوچ زنک ایسری نا خرین آ تدینی تیان اسٹ، توتک تدینی نا دے ءِ۔ اینو آن دہ سال مُست توتک نا ہند آن اشتماعی قبر آک خننگار۔ توتک نا دا ویل اینو اسکا ایسر متنے، وی بی ایم پی نا پریس کانفرنس آن پد دا ویل سپریم کورٹ ئے سرمس ولے زوراک آ ادارہ غاتا مونا عدالت فیصلہ کننگ کتو۔
او پارے کہ سَئے سَد جون خننگا ہرافتان بیرہ اِرٹ نا ٹیوار مسّنے۔ نن ولدا تینا خواست ئے کینہ کہ ایلو جون تا ٹیوار کن زورئٹ بیگواہ کننگوک بندغ آتا خاہوت آتون اوار جون تا ڈی این اے ٹیسٹ کننگہ و ہرا یانزدہ قبر ئے دائسکان خُتنگ متنے اوفتہ ہم ختنگہ۔ اگہ چھار قبر آن سئے سد جون ملّنگ کیک تو ایلو ہفت قبر آن ہم بھاز آ جونک ملّنگ کیرہ ہرافتا پٹ ئہ پول مروئی ءِ۔ علاقہ اسکان خاہوت آتہ و تنظیم ئے الّنگ مرے۔
ماما قدیر بلوچ مُستی پارے کہ دا ویل ئنا ڈوہ دار آتِہ انصاف نا تلہ غا ہتنگ المّی ءِ، ولے ہندن لگّک کہ زوراک آ ادارہ غاک و دا ریاست نا فوج ئنا آئینی سربراہ و غُٹ آن بھلا عہدہ غا تا تولوکا بندغاک ڈوہ دار آتہ کمک کننگ ئٹی ءُ۔
اینو نا دے ئنا رد ئٹ وی بی ایم پی نا چئیرمن نصر اللہ بلوچ میڈیا غا اسہ خاص نوشت ئس شنگ کرے، و وی بی ایم پی نا کیمپ آ پریس کانفرنس کرے۔ او توتک تدینی و عدالت ئٹ اوڑا چلیفوک کیس تیا شابیتی ئٹ ہیت کرے۔
نصر اللہ بلوچ توتک ئٹی خننگوکا اشتماعی قبر آتا بابت ئٹ حکومتی دعوی غاتِہ رد کرِسہ پارے کہ حکومت نا رد ئٹ اولیکو دے یعنی 24 جنوری 2014 آ 11 جون خننگا 25 جنوری آ 2 جون خننگا 30 مارچ 2014 آ توتک آن پین 4 جون خننگا۔ یعنی حکومت نا پاننگ ءِ کہ توتک نا اشتماعی قبر آتیان 17 جون خننگانے ولے گواچن دانا چپ ءِ، توتک ئٹ اشتماعی قبر آتا کچ 11 اسک اوڑے بیرہ 4 اشتماعی قبر خُتنگ مسس و توتک آن خننگوک جون تا اسل کچ کمیشن و حکومت نا کچ و حساب آن کیہی زیات ءِ انتئے کہ ہرازدے کمیشن اشتماعی قبر آتِہ ہُننگ کن توتک آ ہناسس، صحافی سحر بلوچ ہم ہموڑے اس۔ سحر بلوچ نا رد ئٹ توتک ئٹی اشتماعی قبر آتا کچ 11 ءِ و بیرہ 4 اشتماعی قبر ختنگانو۔
او عدالتی کارروائی تیا بے جاراتی نا درشانی کرِسہ پارے کہ سپریم کورٹ توتک نا دا تدینی آ سوموٹو نوٹس ہلنگ آن ویتہ ہم دا بندغی المیہ غا انصاف نا عمل ئے پورو کتنے۔ سپریم کورٹ سانحہ توتک آ 3 سماعت کننگ آن پد دا کیس ئے بیگواہ غا بندغ آتا کیس آتون اوار کرے۔ ولدا سپریم کورٹ 2018 ٹی بیگواہ غا بندغ آتا کیس آتِہ "بیگواہ غا بندغ آتا کمیشن” نا حوالہ کرے اوکان پد دا کیس آ سپریم کورٹ ئٹی سماعت متنے۔ حالانکہ ڈیہی قانود آتا رد ئٹ سپریم کورٹ نا دا آئینی زمہ واری جوڑ مریک کہ او توتک نا دا تدینی نا کیس ئے ایسر اسکان سر کے۔
او پارے کہ پاکستانی سپریم کورٹ آن توتک نا دا تدینی نا کیس آ دوارہ سماعت و جون تا ٹیوار کن ڈی این اے ٹیسٹ نا خواست کرِسہ پارے کہ ڈیہی قانود آتا رد ئت داسہ دا ساڑی چیف جسٹس نا زمہ واری مریک کہ او سانحہ توتک کیس آ دوارہ سماعت بناء کے و توتک آن اشتماعی قبر آتیان خننگوک جون تا ڈی این اے ٹیسٹ و پوسٹ مارٹم رپورٹ صوبائی حکومت آن خواہے۔ کھسفنگ مروک و اوفتِہ کھسفوکا تا چائنداری پک کننگِہ۔ توتک تدینی نا اصل گواچن آتِہ مونا ہتیر و دا تدینی نا اصل ڈوہدار تِہ انصاف نا تلہ غا ہتنگ کن تینا کڑد ئے سر ترسہ انصاف نا خواست آتِہ پورو کیر۔
