تربت: استو پاکستانی لشکر اُرا تیا چھاپہ نا وخت آ اِرا ورناتے زوراکی ئٹ بیگواہ کرے، خاہوت تہ ردئٹ کارندہ آک اِرا گھنٹہ آن زیات زالبول و چنا تیا بیدادی کریر۔
بلوچستان ئٹی زوراکی ئٹ بیگواہی تہ لڑ دائسکان برجاء ءِ ہراڑے دا تدینی تا برخلاف سوراب و تربت ئٹی مُسہ جتا ہند آتیا تولوک برانز مننگءِ۔
ضلع کیچ ئنا بنجاہی شار تربت آن استو پاکستانی لشکر پین اِرا ورناتے زوراکی ئٹ بیگواہ کرے۔
ہندی حوالکار تہ ردئٹ استو 2 بجہ غا تربت نا ہند نیو بہمن ڈھنک ئٹ پاکستانی لشکر فرنٹیئر کور جاوید کریم بلوچ و ہمسایہ تا اُرا تیا چھاپہ خلک، دا وخت آ جاوید کریم بلوچ نا ایڑ ئنا مار بلال بلوچ ولد حیدر علی و ہمسایہ اسماعیل ولد حیر محمد ئے دزگیر کریسہ نادرست جاگہ ئس درینے۔
حوال تا ردئٹ کسرندہ آک اِرا گھنٹہ آن زیات اُرا تے پٹار و زالبول و چنا تیتون اوار ایلو بندغ آتیا بیدادی کریر۔
پن کروک ہڑتومکا ورنا تہ بابت ئٹ دائسکان ہچ وڑ ءُ حوال رسینگتنے۔
