بلوچستان نا انڈسٹریل شار حب چوکی آن پاکستانی لشکر ورناس زوراکی ئٹ بیگواہ کرے۔ بیگواہ کننگوک ورنا الطاف نا مار زبیر بلوچ نا پِن ئٹ چائنگ مسنے، او اسِہ صحافی ئس ءِ۔
زوراکی ئٹ بیگواہ کننگوک ورنا نا ایڑ ئنا پاننگ ءِ کہ اسِتو نن ئنا 3 بجہ غا ویگو گاڑی تیٹی سوار سلاہ بند بندغ آک اُرا غا چھاپہ خلسہ کنا ایلُم ئے زورکی ئٹ دزگیر کرسا بیگواہ کریر۔
اونا زوراکی ئٹ بیگواہی نا برخلاف خاہوت کیچ تجابان نا جہہ آ برانز کرسا سی پیک کسر ئے بلاک کرینے۔
ماہ رنگ بلوچ دا بارث ئٹ پارینے کہ بلوچستان ریاست پاکستانی نا ہمو کالونی ءِ ہراڑے آئین و قانود آن ویتہ ہم ظلم و زوراکی برجاء ءِ، بلوچ زنک کشی نا پالیسی ٹی دے پہ دے تیزی ہتنگ مننگ ءِ۔
ماہ رنگ بلوچ پارینے کہ ظریف بلوچ ئے بیدس عدالت کھسفنگ نا برخلاف تربت فدا چوک آ برانز برجاء ءِ۔
او مُستی پارے کہ قلات آن زوراکی ئٹ بیگواہ کننگوک اختر شاہ نا خاہوت تِدوکا 48 ساہت ئے کہ منفی 10 ڈگری نا یخ ئٹی بھلا کسر آ برانز آ توسنُو۔
ماہ رنگ بلوچ پارے کہ ہندا وڈ، تِدوکا نن ریاستی لشکر و ڈھکوک ادارہ غاک حب چوکی آن بلوچستان یونیورسٹی نا خوانندہ زبیر بلوچ ئے زوراکی ئٹ بیگواہ کریر، اونا خاہوت ہوشاب آ برانز کرینے۔ او پارے کہ مُچ بلوچستان دا وخت آ تینا سرزمین آ زندہ مننگ کِن بنیادی حق آتیکن اسِہ وڑ جلوس و برانز کننگ ءِ۔
یات مرے کہ زبیر بلوچ اسِہ حوالکار و نوشتہ کار ئس ءِ، او مہالو بلوچستان نا پِنی آ اخبار انتخاب ئٹ کاریم کرینے۔
