نوشت: پندرانی بلوچ
براہوئی مٹ: زراب بلوچ
منہ دے آن آی شہید سلیمان نا بارو ئٹ نوشت کننگ نا کوشت کننگ اٹ۔ جاگہ جاگہ غا قلم و جاگہ جاگہ غا لوز آک آواری ئے الیرہ۔ خیر وخت ئنا بے رحم پنجہ غا تیان پیشماٹ گڑاس نوشت کننگ نا کوشت کریٹ۔ شہید علی خضدار نا علاقہ باغبانہ ٹی رہینگاکہ۔ او غریبو خاہوٹ ئسے آن اس۔ ای شہید علی ئے چُنکی آن چائسُٹہ و اونا خُڑک ئنا سنگت ہم اسُٹ۔ او اندُنو بندغ ئس اس ہرا مدام مخاکہ و نرم مزاج ہم اس۔ دنو بندغ اسل مچٹ مریک۔
کنے یات ءِ ہر وخت علی خضدار آن میڑک پاس کرے۔ ولدا تینا خواننگ ئے مونا برجاء تخنگ کن کوئٹہ آ ہنا۔ منہ تُو آن پد ولدا خضدار آ بس۔ کنا اوڑتون ملاقات مس کنے لگا آو تینا چھٹی تیا بسُنے۔ ہراتم علی پارے ای تینا خواننگ ئے برجاء تخنگ کپرہ انتئے کہ خواننگ برجاء تخنگ کن پیسہ خواہک ہرا کنتو اف۔ دا کھل ئے بننگ آن پد ای تہٹی پناٹ بس کنتو داڑ کن افسوس آن بیدس پین ہچ الو۔ دا حال ئٹی ہم علی مخاکہ و ای علی آن اریفٹ داسا مستی انت کروس؟ او پائے بس داسا ای ڈگری کالج خضدار ئٹی داخلہ ہلیوہ تینا خواننگ ئے برجاء تخِوہ، اوار دکان ئسیٹی کاریم ہم کیوہ تانکہ تینا خواننگ نا خرچہ ئے کشیو و خواننگ ہم برجاء مرے۔ بھاز دے آن پد علی تون ملاقات مس او بھاز اشتافی اس پائے سنگت بشخس ای ہننگ اٹ خلق آ ارغ کنوئی ءِ ولدا درزی نا دُکان آ کاوہ ہراڑے ای کاریم ہم کیوہ۔
علی پارِسہ ہناکہ ایلو اینو 6 بجہ نا وخت آ ریلی ءِ اوڑا ہم ہنوئی ءِ نی ہم المی بریس ریلی آ۔ او وخت علی بی ایس او آزاد ئٹی اس۔ علی تینا کھل کاریم تِہ ایمانداری و مخلصی ئٹ کریکہ۔ ہر وخت اودے امرو کاریم ئس تننگاکہ او تینا کاریم ئے جوانی ئٹ کریکہ۔
ہرا وخت او کالج ئے چُھٹِفے۔ او وخت او درزی نا دُکان آ استاد ئس جوڑ مسس۔ منہ دے علی خننگتو اونا فون ہم بند اس۔ ای بھاز کوشست کریٹ اوڑتون حال حوال کننگ کن ولے متو۔ اسہ سنگت ئسے آن ارفیننگ آن پد سما تما علی بیگواہ مسُنے۔
علی یک نیم سال ئسکان دژمن نا اذیت خانہ ٹی اذیت سگِسہ دژمن ئے تینا خیسنا خنتے نشان تِسکہ۔ ہرا وخت او یلہ مس او خلق آ ہنتو بلکن سنگت آتا ہنا جنگ ئے سمبھالا۔
منہ دے آن پد کنے اسہ نا درستو نمبر ئسے ان کال بس۔ ای اسہ دم ئٹ او مہروان آ توار ئے چائسُٹ۔ ای اوڑتون ہیت کریٹ سنگت علی پائے کنے نے خنوئی ءِ ای ہم پاریٹ بس سہی ای منہ گھنٹہ نا سفر کرِسہ اودے سر مسُٹ۔ چھار وخت آن پد دا ننا اولی ملاقات ئس۔ ای اولی ٹی تِتوٹ تہ انتئے کہ او دژمن نا اذیت ئے سگِسہ کنا مونٹی اس۔ است پاریکہ بس اودے بنِسہ کیو اونا دلیری نا کسہ ئے ہرا او مخِسہ پاریکہ۔ اندنی ٹی علی پائے سنگت کنے منہ دے آن پد چھٹی آ ہنوئی ءِ لمہ ئے خننگ کن۔ اِرا سال مریک ای لمہ ئے خنتنوٹ۔ ای پاریٹ ہیو سنگت نی بر کنا خلق آ لمہ ئے ہموڑے خواہِفنہ گڑا نی لمہ ئے خن۔
منہ وخت ان پد علی ننا خلق آ بس۔ تینا لمہ ئے خواہفے منہ وخت تینا لمہ تون آوار ننا خلق ئٹی مس۔ ہرا وخت اونا چھٹیک چھُٹنگ اسُر اودے ولدا محاز آ ہنوئی اس گڑا او تینا لمہ ئے بھاز نرم مزاجی ئٹ حوصلہ تننگ اس۔ او وخت ہمرو جغری ءُ بندغ ئس مرے او ہم دیر مریک ویہک۔ ولے ای اودے سنگت آتا حوالہ کریٹ واپس شال آ ہناٹ۔
سلیمان شہادت آن منہ دے مست کنے فون کرے پائے سنگت کنا چھٹیک مسُنو ای نا خلق آ بریوہ لمہ ئے خننگ کن۔ ای تینا بے سواد آ زند ئٹی آختہ اسُٹ۔ او وخت کنا پیپر آک ہم اسُر۔ ای سنگت ئے پاریٹ منہ وخت آن پد کنا پیپر آک چُھٹیرہ گڑا ای بریوہ داڑ کن۔ او کنا چھٹیک کم ءُ۔ گڑا ای پاریٹ سہی ای سنگت ئس اریوہ او نے کن بریک۔ بد بختی ئے اوڑے کس سنگت الو۔ بیوسی ئٹ کنے پاروئی تما سنگت منہ وخت صبر کر گڑا شہید پائے سہی سنگت نی تینا پیپر آ تِہ تسلی اٹ ایت دا ولدا ہورینہ ای پاریٹ اینو نا تب جوانے نہ؟ او پائے ہیو نن کھل جوان و برابر اُن نی تینا امتحان آن فارغ مر گڑا خنینہ تینے۔
کنا منہ پیپر مسوسر پین اِرا پیپر کنا رہینگاسُر کہ 2016 شام ئنا نماز نا وخت آ کنے میسج ئس بس کہ علی ننے آن رسخت مس، ای میسج ئے خواناٹ ہرا جاگہ غا تولوک اسُٹ اموڑے آمد سوج ئٹی تماٹ، کنا مونا انت مننگ اس کنے ہچ سما تمنگ الو ی تینے شَل محسوس کننگ اسُٹ، کنے آمد لگاکہ کنا بدن نا نیمہ بخش کنتو اف۔ ہوش ئٹی بسُٹ تینے ڈوہدار خناٹ۔ تینا گڑاس سوج آتا ورندی تننگ کتوٹ۔ اینو ہم ای پاوہ ای انتئے دُن کریٹ؟
مگہ علی کنے بشخو؟
مگہ علی نا لمہ کنے بشخو؟ ای انت پاروٹ علی نا لمّہ ئے؟
اینو ئسکان ای دا سوج آتا ورندی تننگ کتوٹ؟
کریس محشر زند ئے الاس ہناس
تیسوس بڈ ئس غم تِہ الاس ہناس
