نوشت: گُلزار بلوچ
زرمبش نوشتانک
سما اف دا چِٹی نے اراتم رسینگو، اُمیت اندادے نے رسینگو۔ سما اف نی دُژمن نا اٹکل تا بابت ئٹ سوچ ئٹی مروس۔ سما اف نی کسر تیا تینا دوٹی متکُنو اکس ئس کروس و دژمن آن تینا راج ئنا بندغ آتیکن آجوئی نا جُہد ئٹ مروس، سما اف نی شال ئٹی مہردار نا دلبند آ راستی نا سیخا تون ہمگام مروس، خبر اف نی وداری آ لُمہ و وداری آ دشتار آتا کُمک ئٹ مروس، ہراڑے ہم مریس دژمن تون مون تننگ نا پچّار ئٹ مریس۔ مننگ کیک زندان ئٹی بندی آ ایڑ ئنا نیتون حوال ئس ہم مرو۔ بس ہراڑے اریس وطن کن توار ئس مریس۔
اینو بولان نا اُست، اسلم جان نا چیدہ، دلبر آ مارگٹ نا ٹُل ئسے آ تولوک دا چِٹی ئے نوشتہ کننگ اُٹ، اینو دا چِٹی ئے نوشتہ کننگ نا مسخت آک باز ءُ ولے غُٹ آن گیشتر دادے کہ ای دا چِٹی ٹی نا ہنینا زند ئنا اسہ چُنکو ساہت ئس تینتون تدیفنگ کن اسہ خواست ئس کیوہ۔۔۔
ای و نی۔۔۔، بھلو جنگ ئسے آن پد۔۔۔ دتر آن پُر وہوکا جو تیان و دتر نا گند ئٹ چرخ کروکا تہو تیان پد۔۔۔ بولان، سیاجی، باتیل، بڈو ٹی پند خلنگ آن پد۔۔۔ ہِس مروکا راسکوہ ئے گلاب و سوسن بشخنگ آن پد۔۔۔ اُستاد اسلم نا سوچ ئے ایمان کننگ آن پد۔۔۔ لُمہ یاسمین نا صبر ئے کلمہ جوڑ کننگ آن پد۔۔۔ جِند ندر آتا جَن ئٹ مجید جان ئے سجدہ کننگ آن پد۔۔۔ بیمسرک آ خیصار نا ندارہ تون بشخندہ ئسے آن پد۔۔۔ ٹِک تیر آ دل جان ئے شور پارود نا خدا جوڑ کننگ آن پد۔۔۔ دلبر آ حق نواز نا خزمُلی خنتے و ساہ کش آ دروشُم ئے داستانِ زیبائی کننگ آن پد۔۔۔ سُم تا امیل ئٹ امیر جان نا گڈیکو سُم ئنا فلسفہ ئے ایمان جوڑ کننگ آن پد۔۔۔ زیبل آ و شتکو آ یار شوکت جان نا گُڈیکو جاہ ئے بانکُر کننگ آن پد۔۔۔ شاشان نا ٹُل اٙ کوہِ سلیمان، کاہان و مکران ئے سجدہ کننگ آن پد۔۔۔ لُمہ نا وداری اٙ خن تا دیدار آن پد۔۔۔ بے وس اٙ ایڑ ئنا بنگڑی تا شونقی آ توار آن پد۔۔۔ حانُل نا خلق ئٹ سرگنوک آ مُرید نا بننگ آن پد۔۔۔ دوزان نا آبِ زم زم انگا دیر تیان تینا ملاسی ئے ایسر کننگ آن پد۔۔۔ دلبرو آ مچھُل ئٹ، دا ڈغار نا سرمچنڈ آ عاشق آتا کِسہ غاتِہ بننگ آن پد۔۔۔ ناگاؤ، نرمُک و اسپلنجی نا خرما خنّی تا جنگی اٹکل آتِہ سرپند مننگ آن پد۔۔۔ نوشکلی آ زباد ئے، اُست ئے تینا کروکا مِہر ئے و شتک آ شاہ فہد نا دلاوری ئے خواننگ آن پد۔۔۔ بولان، شور، چلتن، راکیل و شخاری ئے طواف کننگ آن پد۔۔۔ ای و نی بیرہ ای و نی۔۔۔
دا کُل آن پد ای و نی شور ئٹ پند کرون، ای و نی زیبا غا نلّی نا پہناد آن گدرینگون، شہید آتا دتر تیان جوڑ مروکا پُل آتِہ گند کشّون، مچٹ ئس پین ای و نی گھام خلون و کبلہ نیمہ غا مش ئسے آ لگینگ نا کوشست ئٹ مرون و اندا ساہت ئٹ نی دمدرینگوس تولوس و آسمان نا پارہ غا ہروس، کُڑمبو سوچ ئسیٹ ہِنوس ولدا پاروس مہروان دا مشک اخس زیبا ءُ کہ دافتیٹی اسہ زیبدارو جنگ ئس مسنے، وا دا زیبدار آ جنگ ئٹی چندی زیبدار آک تینا بےمٹ آ ساہ تِہ نٙدر کرینو۔۔۔ اندُن اسہ نزورو توار ئسیٹ پاروس کہ مہروان ای دمدرینگاٹ۔۔۔ اندا ساہت ئٹ نی تینا چُنکی نا اٙدت ئے تازہ کننگ آن پد چندی سوج آتِہ کروس۔۔۔
*مہروان نُم دا مش تیٹی امر پنج دیری تون جنگ کریرے؟ *مہروان نی جنگ ئٹی دمدرینگاسہ ؟ *مہروان نُم فوجی جُلہوّ ( آپریشن ) آتا وخت آ مش تیا امر زُوت و اسہ دم ئتون لگارے؟ و اندا ساہت ئٹ ای نے پاروٹ کہ او کنا زامُر ! دُو ئے تینا ایت، ای نا سیبو مرِسہ نا پمبہ غا دو تیٹی ہلوٹ نیتون کُمک کروٹ۔۔۔ چُر آتیان پند کرِسہ ای و نی مارگٹ نا دے ٹِکی پارہ غا تینا گڈی ٹھکانہ ئے جوڑ کرون۔۔۔
نی چُپ مروس، دا خاطر آن آخہ کہ نی دسکہ دم دروک اُس۔ نی بڈو و شور ئنا پند آتِہ اُست آ ہتوس و نی آجوئی آن مہالو نا وخت آتِہ یات کروس و ساہت ئسے آن پد اسہ دم کشو توار ئسیٹ پاروس جی ہئو زند آجوئی آن پد بناء مروکا ءِ۔۔۔ انداڑے نی کنے پاروس مہروان، ای نیکن مونو چاہ ئس جوڑ کیوہ و ایلو نیمہ غا ای تولوک نا زہیری و اُست خواہی ئٹ ابّکہ مروٹ و نا زیبائی ئے درشان کننگ نا خیال ئٹ مروٹ۔ نی تینا خیسُن آ شال ئے کشوس۔۔۔ ایہن زامُر دا خیسُن آ رنگ تون کنے چٹ باز مہر ارے، نا شال خیسُن، گواڑخ ہم خیسن، نا جوڑک گلابی آخہ بلکن او ہم خیسن، ننا لُمہ وطن نا بیرک ئٹ زی ئنا کُنڈ ئنا رنگ ہم خیسن، ننے آجوئی نا مِزل آ سر کرے او ہم اندا خیسُنی، کنا اولیکو درسگاہ نا بیرک نا رنگ ہم خیسن، کل آن گیشتر نا زیبائی آن ہم گیشتر ہمو خیسنی، ہرا کہ کنا وطن نا رکھ ئکن شولنگا ہمو زگر آ دتر ہم خیسن، ہمو خیسنی کہ ہراڑتون فدائیک تینے اسٹ کریر۔۔۔ ای چوخت ئس کہ وطن نا زیبل آ جند ندر آتیکن شئیر نوشتہ کریٹہ ای اوفتِہ خیسن انگا خن تون تشبیہ تسوٹہ ہمو خن ہم خیسن۔۔۔
ای اندا اُست کش آ ندارہ غاتون ماخول مروٹ نی پاٹ چِمولی کننگ ئٹ گھٹ مروس و تینا نازُرک آ دُو تیٹ خاخر ئے لگِفوس و چاہ ئنا تیار مننگ نا ودار ئٹ مروس۔۔۔ و اندا نیام ئٹ نی سوج ئس ردیفوس پاروس۔۔۔!
*مہروان! نی دا جنگ ئٹ وخت ئس کنے اُستا ہیسوسہ۔۔۔؟
گڑا او وخت اٙ ای نیکن، نے شاد و گل تخوکو ورندی خنتوٹ بیرہ انداخس پاروٹ،
ہئو ساہ ئنا بند۔۔۔!
گڑا نی اسہ وار پدا سوج کروس ارا ساہت ئٹ۔۔۔۔؟
ای پاروٹ: وخت ئس کہ نن دژمن نا کیمپ ئسے آ جُلہو کننگ ئٹ سرسوب مسُنہ گڑا ای اندا ٹَک خلکُٹہ کہ اگہ نی کنتون دا جنگ ئٹ اوار مروسُس دا جنگ اخس باز چٙس کریکہ۔۔۔۔!
و نی ساہت ئس چُپ مروس و کنے تینا پارہ غا چِکوس و کنا کاٹم ئے تینا زان اٙ تخوس و نا ہوش چاہ ئنا تیار کننگ تون مرو۔ کنا مُچا ہوش و پام نا لاغر و گٙڈ مثیل آ لِخ ئنا زیبائی تون مرو۔ بیرہ نا لِخ، ہرانا نازُرکی آن خُرن اٙ رغّک ہم پاش خننگرہ۔۔۔ اندا نیام ئٹ نا زیبائی کن غزل گوفّوٹ۔۔۔ نا زیبائی بیرہ نا لِخ کہ ہرانا زیبائی ئے، کنا خیال ای غزل نا ہژدہ بحر ئٹ کننگ کپروٹ و ای اندا نیام ئٹ نیکن آجو نظم ئس نوشتہ کروٹ۔
انداڑے نی کنا خن تیٹی تینا ساہ کش آ خنتے خلوس و اریفوس مہروان! ای نے انتئے دوست اُٹ؟
کنا ورندی مرو کہ، زامُری نی کنے بےکچ دوست اُس و دا دوستی نا سوّب آک چٹ باز مرور۔۔۔
زامر نی خلق ئٹ مُدام دژمن نا بر خلاف لس مخلوق ئے سیاست نا پِڑ اٙ ہتنگ کن جہد ئٹی اسوس، نی ہمو جاگہ غان تعلق تخِسہ کہ ہراکان کنا شتکو آ سنگت خزمُلی آ شوکت جان عرف سفر خان تعلق تخاکہ، نی ہمو جاگہ غان اریس کہ ہراڑے کنا زند ئنا شش سال تدینگانو، کُل آن گیشتر نی “ضیاء جان” نا خلق آن تعلق تخِسہ، و انداڑے نی بشخندہ کرِسہ پاروس مہروان! کنا و نا دوستی نا سوّب ہم اجوئی نا جنگ ئنا مہر آک مسنو۔
کنا ورندی بیرہ خن تا سرفُنگ ئٹ مرو کہ جی ابو گِڑدلو۔
اندُن دا نیام ئٹ نی قیامت ئت ہتوس، کنے پاروس مہروان!
تینا کاٹم ئے مچٹ ئس بُڑزا کر و ای اسہ بےسیک ءُ اُست ئسیٹ کاٹم ئے چِست کروٹ و انداڑے ننا مون انگا چاہ تیار مرو۔
اندا ساہت ئٹ نا سوج آک مدام کاٹم ارفور و نی پاروس مہروان!
جنگ انت ئس ءِ؟
ای پاروٹ۔۔۔ “زِند”
نی پین سوج ئس کروس!
گُڑا زند انت ئس ءِ؟
ای پاروٹ “بیرہ جنگ”
زامُری نی کنتون باز ہیت و گپ کروس، نی کنتون جِندندر اٙتا فلسفہ نا زی اٙ ہیت کروس، نی کنے آن جنگ آتا کسہ غاتِہ اریفوس؟ نی کنتون اسلم جان (خدا) نا سوچ و فکر، دلاوری، جیرت، سگّ و گُشاد آ خیال آتا بابت ئٹ ہیت کروس۔ نی ریحان جان و سربلند جان نا زیبائی نا ہیت آتِہ کروس، نی کنتون درّہ بولان و ہیروف نا اٹکل آتا بابت ئٹ ہیت کروس۔ نی امو ہیت آتِہ ہم کروس چوخت ئس جنگ ئسے نا حوال بسکہ گڑا نی وطن نا سرمچنڈ آ سرمچار آتیکن اخّس دعا کریسہ۔ نی کنتون ادب نا بابت ہیت کروس۔ نی کنتون فلسفہ نا ہیت ئے کروس، نی ادب ئٹی شعر و شاعری نا ہیت کروس و کنا یات ئٹ لکھوکا تینا پنوکا شئیر آتِہ ہم بنفوس۔ نی آشوبی آ شاعر سنگت ابصار نا زلزلہ انگا خیال آتا بنیات نا بابت ئٹ ہم گپ کروس۔ نی کنتون اُستاد مرید نا شئیر آتون تینا خُڑکی نا ہیت ئے ہم کروس۔
زامر نا ہیت و گپ آک بھاز مرور و کنا مسخت بیرہ نا کاغدی آ جوڑ و سوزا غا رنگ اٙ غزل گوفّنگ مرو۔۔۔ گُڈسر ئٹ ننا ہیت آک انداڑے ایسر مرور کہ جرنل اسلم جان ننا خدا ءِ و بولان ننا کعبہ ءِ۔۔۔
انداڑے نی خواست ئس کروس و پاروس مہراوان! ای و نی شئیر ئس نوشتہ کینہ، جی ہئو غزل ئس، ہرانا مطلح مہروان! ای تینٹ مروٹ و نی شئیر ئنا مقطح مروس۔ دا شئیر تینا ادبی قانود آتیان پیشن چٹ بھلو شئیر ئس مرو۔ دا نیامٹ کنا و نا خیالاک جنگ کرور۔۔۔ کنا و نا مصرعہ غاک تینا بھلُنی آن دم درینگور۔۔۔ کنا و نا شئیر آتا وزنک علم عروض نا ملی ٹی ہم بفرور۔ کنا و نا شئیر جہان نا ہمو شئیر مرو، ہرانا نوشتہ کروک آک اِرٹ ءُ۔ اندا ساہت ئٹ کنا خیالاک تِرڑو الور و ای زُوت ئس مقطح غا دُو ئے سخت کروٹ۔ اسہ وار ولدا ای تینا نت تا شیف آن ڈغار ئے مُر مننگ آ خنوٹ و ای نے آن اریفوٹ زامری! دننا تخلص ئے مقطح ٹی نوشتہ کین ؟
اندُن نی اسہ بھلو کُڑمبو سوچ ئسے آن پد پاروس کہ کنا مہروان! ای و نی اسِٹ اُن۔۔۔، گُڑا تخلص ہم اسِٹ انگا زامری ءِ بیرہ زامر۔۔۔!
دا ساہت آن پد ننا ہیت و گپ آک اُستاد مرید نا شئیر آتیا مرور۔۔۔ہرافتا اخس کہ ای نے کن تشریح تون اوار مفہوم آتِہ درشان کیو و نی گیشتر پارسہ کروس دیخس پین خوڑتی ئٹ درشان کر مرید جان ءِ و گڈی ساہت ئٹ نی پاروس مرید ننا شاعری نا خدا ءِ۔۔۔ جی ہئو خدا بیرہ خدا۔۔۔
پدا اسہ بھلو چُپی ئسے آن پد نی کنے ان پُر مہر ءُ خواست ئس کروس، کنا مہروان! ای اینو نا دا دلبر آ توفک (روسی کلاشن) ئٹ گِڑاس سُم خلِنگ خواہوہ، کنا چُنکی آن بھلو ارمان ئس ءِ کہ ای کلاشن ئٹ منہ سُم خلیو اُریو کہ توفک نا زیبائی انت ءِ؟
اسہ وار ئس پدا داڑے نے کٙن کہ ہیروفی ءُ ندارہ ئس جوڑ کروس، بیرہ دا خاطر آن آخہ کہ کلاشن مہروانو توار ئس بش کیک بلکن دا سوب آن کہ نی اخہ در زیبدار خننگوس، نا لاغر انگا مُخ آ امیل تفوک مرو و امیل مچٹ ئس لڑونج مرو، اندا ساہت اخس گچین و زیبدار مرو کہ نا زیبدار انگا بالاد آن امیل بھلُن مرو۔ نا پمبئی و اُشکُن انگا دُو تیا کلاشن نا لبلبی (ٹریگّر) مرو و اینو امو کلاشن ہم تینا وجود آ گمر کننگ مرو۔۔۔ کلاشن نا پاٹی آ کُنداخ، امو ہنامی آ رنگ ئنا کُنداخ ہرا نا رنگ ہم نا ہنامی آ پُژہ غاتا وڑ ئٹ مرو، اندُن ہرا نا اُست ئنا زی آ تِخوک مرو۔ کنداخ نا راست انگا کُنڈ نا کلّک تون خُڑک مرو، اسہ وار ولدا امو سیلہ ہراڑا نی اُرِسہ لبلبی ئے پرنچِسہ او ہم تینا وجود اٙ پَت کرو۔
نی خواست ئس کروس، پاروس مہروان! مہروان! نی کن کہ خَل تا چیدہ ئس جوڑ کر و ای اودے ٹِک کیوہ۔ گڑا ہمو وخت آ کنا ورندی اندا مرو۔ زامُر اینو نی آجو اُس، اینو ہرانگی فائر کیسہ کر۔ گر مہالو وخت ئس کہ نن نشانہ ہلکُنہ گُڑا اے لونڈو خیرات خصلت آ دژمن اسکہ۔ اینو دژمن اف و اینو دا گلزمین نا رکھ ئے کروکا خل تِہ و زیبا غا مَش تِہ ای تینا سُم تیان دڑد تننگ خواہپرہ۔
اسہ وار پدا نا سوج آک کاٹم ارفور و پاروس کہ، نی جنگ ئے سرپند مننگ کن دیر ئے خواناسہ و امر خواناسہ گُڑا کنا ورندی تننگ آن مُست نی گپ ئے بناء کرِسہ پاورس کہ مہروان! ای جنگ ئنا وخت اٙ “جان لاک” ئے خواناٹہ، او بندغ نا بُنداوّی حق آتا زی اٙ ہیت کرِسہ پائک و اندا یخین تخِک کہ باز وخت ” جنگ ایمنی و آسودئی نا ہتنگ کن المّی ءِ۔”
اندن پدا سوج ئنا نیمہ غا ہنِسہ ارفوس کہ مہروان! نی جنگ ئنا بابت ئٹ دیر نا فلسفہ ئے خواناسہ؟ مُتکن انگا ٹپّ آک ولدا شُورنگور، دلبر اٙ سنگت آتا ندر مننگ نا ندارہ کنا خن تا مون آ برو، اسہ دڑد آن پُر ءُ توار ئسیٹ ای نے ورندی ایتوٹ، زامُری! کٙن کہ کنا فلاسفرک، کنا سنگتاک ئسُرہ ہرافتِہ ہر اسہ آپریشن ئسے آن پد ای اندا سرپند مسوٹہ کہ مہالو ای چٹ باز بےفائدہ ءُ وخت ئس گدریفینٹ کہ ڈنی گِڑاس جنگجو تِہ خوانانٹ و شاد مسونٹ کہ ای اِرا کتاب، اِرا راہشون نا زند ئنا بابت ئٹ و اوفتا جنگی کڑد ئنا بابت خوانانُٹ و اندا گمر ئٹ مسونٹ کہ جنگ ئنا لائخی، شیفی بُڑزی و ایلو چم بازی تیان سرپندی تخیوہ ولے کنا جنگ ئٹ، کنا مش تیٹی، کنا کعبہ ئٹی چندی کتابی ءُ دروشم نا کسہ بند اسر۔ ای اگہ خواناٹہ گُڑا زیبل آ شتکو انگا خزم خنی آ شوکت جان عرف سنگت سفر خان نا جنگی لائخی و اٹکل آتِہ خواناٹہ، ای گر خواناٹہ گُڑا ضیاء عرف ٹِک تیر و پُلھین امیر جان ئے خواناٹہ، ای اگہ خواناٹہ گُڑا تینا جنگی آ دین کن، تینا استاد، تینا پیغمبر، تینا قبلہ جرنل اسلم جان نا جنگی سوبری، لائخی و اٹکلی آ جُلہو تِہ خواناٹہ بجائے سن زو، لاک و ایلو فلاسفی و جنگی کماندار آتا ہیت آتِہ رٹ خلنگ آن۔
کنا زامُر اسہ گڑا ئسے آن سرپند مریس کہ بند ءُ کوٹی ئسیٹی نی ہزار آ کتاب آتِہ خوان ولے جنگ کننگ نا لائخی ئے بیرہ نا حالیت آک نیکن دروشم ایتور کہ جنگ امر مریک، اراڑے مریک و اراکان مریک۔
دا وڑ ئنا مثیل ننا خلق ئٹ باز اس کہ ہراڑے گڑاس خواجہ غاک سُہب ئنا لوز آتِہ یات کریرہ و دیگر نا وخت خلق ئنا بندغ آتتون اندا پاریرہ کہ جنگ دُن مریک، فلان جنگجو دُن تینا لشکر ئے درے، فلان دن کرے ولے ارٹمیکو کنڈ آبے وس تولوک آ بندغاک جنگ ئے اسہ پین گِڑاس سرپند مسُرہ۔ پاننگ نا مسخت دادے کہ جنگ ئنا چاہنداری، لائخی و سرپندی بیرہ جنگی پِڑ آ مریک و بندغ اڑزانی ئٹ جنگی شیفی و بُڑزی تِہ پُہہ مریک۔
اینو ہم کنے یات ءِ ہموڑے اسہ بزغر ئس غلہ نا لاب آن بسوسَس، خید آتِہ ساف کرے و اونا بننگ آن غلہ نا ہنین انگا گند مُچا دیوان ئٹ تالان مس گُڑا او جنگ ئنا بابت ئٹ گپ کروکا بندغ آن سوج کرے کہ، او کنا خواجہ!
ای تپرہ داخس کہ نی پِن ہلکُس تپرہ دا بندغ نا پِن اسُر یا پین گِڑا نا پن، نی دا پار کہ ننا پیرہ غاک اینو آن یک و نیم صد سال مُست جنگ کریسر، او وختا ننا پیر اِنگاک ناخوانندہ مسنو، دُنو لوز و دُنو انگریزی ءُ پِن اوفتا مِلی ٹی متنے گڑا اندا انگریز آتِہ ننا پیر اِنگاک امر جنگِ ساڑتاف ئٹ و ایلو جنگ آتیٹی خلِسہ کٹاسُر و اندُن نُورا مینگل تینا جنگی اٹکل آتیٹ امر دُژمن آتا کاٹم تِہ ٹِک کریکہ و جنگ آتیٹی سرسوب مسئکہ۔۔۔؟
زامر جان! کنے اینو ہم یات ءِ کہ خواجہ تینا ورندی ئے جوانی ئٹ تننگ کتو، انداڑتو امبل بش مسک و بیل ئے کوپہ غا تخسہ پارے راج دتر ئٹ اسِٹ ءِ، نا ہیت آک ایسر مفسہ کہ فلان فلاسفر دُن پارینے و فلان جنگی کماندار دُن پارینے۔۔۔! اینو جنگ ئٹی نے آن کسس ارفپک کہ نی اخہ کتاب، ارا کتاب و امرو کتاب خوانانس۔ اگہ اینو نے ڈغار و تینا پجار نا، کوچہ و شار تیٹی لمہ و ایڑ تا پراد و چیہانٹ آتا توار و غلامی نا احساس مس گڑا کنا خیال اندا گڑا نیکن جوانے بجائے دا لوز آتا زنڈی آن۔ دیوان ئٹی تولوک کل تینا کاٹم ئے سُرفیر و پاریر جی ہئو ایلم نا ہیت اک راست ءُ۔
زامُر! یلہ کر دا ہیت ئے و بِن کنا ساہ ئنا بند کہ دا پاک انگا جنگ ئٹ ای نے باز خیال آتا کنار آ جاگہ تسوٹ ولے نا یات آک، مہر آک و دڑد آک وار وار آ کنے بے وس کریرہ کہ زامر، ای نے کن لِکھوّ ولے لِکھوسُٹ انت۔۔۔ نا کنتون بیرہ منہ یات اسر، ہرافتا بابت ئٹ ای تینٹ پاننگ کپرہ کہ امر ءُ۔۔۔ ای کوشست کریٹ نیکن گِڑاس لکھیوّ نا چُنکا بالاد آ، نا غزل رُدفوکا ادا غا، نا مِہر و مابت نا بولان دروشُم آ گُشاد آ و کُل آن زیبا غا، ہنینا، جغر کش آ گُٹ آ کہ ہرا نا سُرور ئے زہری گٹ ئنا ٹُل آ تُولوک شوان ئس تینا مہر آتِہ درشان کیک، ہموڑتون تشبیہ ایتوہ۔۔۔ نے ایہُن دا سما ارے کہ نی وطن کن وخت ئس ہالو خلوس، نی ہیروف نا شہید آتِہ نازیفوس گُڑا اخس زیبا خننگوس؟ ولے بشخِس زامر جان کنا و نا ہمو گڈی کچاری کہ ہرادے ای نیتون زاوہ نا دے ٹِک کُنڈ ئنا مش ئسے نا گھر ئسیٹی کریسٹ، ہمو پُر مہر و پُر دڑد آ کچاری نا بابت ای ہچس نوشتہ کننگ کتوٹ۔ اگہ جنگ آن پد ای آجوئی تون اوار بسوٹ گڑا کنا و نا مہر، زامر انگا پُل ئنا وڑ، ہرا بیرہ چانڑدہ نا توبے آ پاش کیک، او ہم تینا رُدوم ئے بناء کرو۔ اندا سنگر ئٹ تولوک منہ ساہت نا یات ئٹ سُم کُننگ ئے ہم تین کن شکی مننگ نا اسہ بُٹی ئس سرپند مریوہ و سوچِوہ کہ انتئے کنا اُست آ بسوس۔ ای اندا ساہت آ تینا دا جنگ و تینا جند ندر آتا مون آ خن شیف مریوہ کہ ہمو ہرا دا جنگ ءِ جتاؤ دروشم بشخار ہنار، اوفتیکن ای اسہ آشوبی ءُ غزل ئس نوشتہ کتوٹ و ہنینا سنگت آتا یات آتِہ و جنگی کسہ غاتِہ پنّہ غاتا زیبائی جوڑ کننگ کتوٹ۔۔۔۔
زُامری نی سوج کروس کہ او کنا مہروان! ای پُہہ مریوہ دا پاک آ جنگ ئٹ دژمن نا برخلاف ہر آشوبی کسہ نیکن سبخ ئس مسنے، کنے سرپند کر کہ دا جنگ ئٹ نا جیجا نا کڑدار انت ءِ۔۔۔؟ زامُر! ای ابکہ و ژند انگا اُست تون نا پارہ غا چک خلوٹ و سوج ئنا وخت آ نا نازرک آ دُو تا سُرفنگ ئے ہُرِسہ نے ورندی ئس ایتوٹ، ہمو ورندی ہرا نا تہٹی اندُنو یات، مہر و مابت و دڑد تفوک ءُ کہ ہرافتِہ درشان کننگ کن کنا لوز آک ہم ڈُکھال ئسے نا پلویڑ ئٹ مرور۔۔۔
کنے ہمو دیگر نا وخت باز اوغِفے کہ ہراتم ای تینا خلق ئنا خُڑک آن جلہو ئسے کن گدرینگ اسوٹہ، ایلو پارہ غا قبرستان ئسے آ رش کش اسک۔۔۔ ای اُست ئٹی اوغاٹ کاش کہ کنا جنگ اینو خلق ئٹی مروسس تانکہ اندا میت نا کٹّ ئے دُوٹی الوسُٹ و مچٹس تینا چُنا مننگ نا فرض ئے ہم ادا کروسٹ۔ ولے اوغِوہ انتۓ کنے او تینٹ سوغند تسس و نوشکلی اٙ خاک ئنا ریک آتِہ کنا تیدار آ خوشکا و پارے کنا مَٹ اُس۔ اگہ وطن نا جنگ ئٹی کنا کزیت آ اوغاس یا مُونجاؤ دروشم ئس جوڑ کریس یا کن کہ زہیری مسوس گُڑا نا دُوٹی کہ امو توفک ءِ ہرادے پاک ءُ مہر ئسے کن دُوٹی کرینس گڑا اودے کوپہ غان شیف کیسک۔
کنا لمہ، کنا جیجا ہرا نا ہمو ہکل، ہمو مہر ہرا پارے گر دا جنگ ئٹ نا جون بس گُڑا ای خلق ئنا کُل پیر اِنگا بَلہ غاتِہ اسہ جاگہ غا کروٹ و پاروٹ کہ ببو کنا شہید آ مار کن ہالو خلبو۔ ہرا لونڈو، ناپاک آ کوزہ گیر پنجابی تون جنگ کرِسہ سُم تِہ سینہ غا گٹ کرے و اگہ ای نے آن مُست دا جہان آن اِناٹ گڑا کنا مڷ کٙن کہ تینا توفک نا سُم تیان منہ سُم ئنا کوکا خالی کیس، ہرافتا سُنٹ بیرہ دژمن نا کاٹم اٙ کارمرز مرے و اندُن کنا لُمئی یات ئٹی اِرا سنگر کنا پِن آ جوڑ کیس ہرافتیٹی کنا کل مارُوک تولِر و کوزہ گیر تون جنگ کیر۔۔۔
کنے یات ءِ کنا لمہ نا اسہ کُلہو ئس کنے آ سر مس و او پاریسس کہ کنا مڷ ای مچٹ ئس نزور مسونٹ۔ اُست اینو خواہس کہ ای نیکن چِٹی ئس لکھیو، مننگ کیک دا کنا نیکن گڈیکو چِٹی مرو و دا چِٹی ئے نے کن دا سوب آن نوشتہ کتنُٹ کہ نی بر نے کن زہیر کرینٹ، بلکن دا خاطر آن کہ دژمن نا داسہ پد ئنا نت تیاٹے۔ کنا مارُو جنگ ئٹ شاد و گل مریس۔ کنے اُست آ ہتپیس، گر کنے اُست آ ہیسوس گڑا دا سرپند مریس کہ نی جنگ ئٹ تینا سنگت آتون سنگتی ٹی نزوری کرینُس۔ ہرا تینے نٙدر کریر ولے اُرا ئے، لُمہ و ہنینا ایڑ تِہ گیرام کریر۔ پین کنے اُست آ اتپیس، جنگ ئے داسہ دُژمن ئے سرپند کبو کہ جنگ انت ئس ءِ۔۔۔
بس کِسہ ہمودے کہ ہر ہمو غلام تون مریک و اندُن اینو ننا اُرا غا پلیت انگا دژمن جُلہو کریسس کنا پیر انگا لمہ ئے ہم اینو سُم تا گواچی کریسس۔۔۔ اینو لمہ ہم جنگ ئے تینٹ سرپند مسسس و مُدام اندا پاریکہ کوزہ گیر غلام آتون ہر گڑا کننگ کیک و ای ہم تینا ڈغار و ننگ ئنا رکھ ئکن مرگ ئے خُمب کرِسہ اودے بخیرٹ پاوہ۔۔۔
زامُری نی خڑینک آتِہ پاک کرسا پدا اسہ سوج ئس کروس کہ مہروان! نی داڑے بیرہ تینا لمہ نا ہیت آتِہ کریس ولے نی تینا ایلم، ایڑ و باوہ نا گپ آتِہ کتویس۔۔۔؟
و اندُن ای خڑینکی خن تتون آجو مننگ آن مُست نا یات آتِہ اُست آ ہتوٹ، لمہ نا زان آ کاٹم تخوک ہمو مہر ئے اُست آ ہتوٹ، ہمو شینلو آ و ہنینا ایڑ ئنا مہر آتِہ است آ ہتوٹ کہ ہرا چاشتی نا وخت آ بلوچی کشیدہ نا موغِنگ تون ماخول اسک و مدام کنے اندا پاریکہ ایلم جان دا ہفت رنگی آ دوچ نا دشتار نا ءِ و ننا زیبا و ہنین انگا نشار نا ءِ و ایلو پارہ غا کنا باوہ جان تُولوک اس ہرا کنے مدام پاریکہ کنا مار نے کن نا زند ئنا ہمسفر ئس پٹنگ اُٹ و اندا پاریکہ پیر مسونٹ، نت تیان شل اُٹ بس کنا زند ئٹ و کنا خن تا مون آ نا برام مرے کہ کنا پیرانسری نا بانچُل مر۔۔۔
زامُر جان! دا ننا خلق ئٹ روشنائی نا ایسری و پُوسکُن تہاری مننگ نا وخت اسک کنا پیر انگا باوہ نت تیان شل کٙٹ ئسے آ تولوک حوّیلی ئے سیل کننگ اسک و ایلو پارہ غا کنا ایڑ نمازی اٙ تولوک نماز خواننگ اسک و اندُن ایلو پارہ غا میڷ تا گیڈ ئٹی کنا جیجا سَہدار تِہ دِیر و بَئے کننگ و اوفتِہ بیڑنگ اسک۔ داکان ای وداری اسُٹ کہ لمہ جان کن کہ بریک پاڷ ئنا چاہ ئس کیک۔ اندا ساہت ئٹ اسہ وار ئتون زمبارہ ئس مس۔ مُچا خلق چُپ مسک و اندا چُپی آن ساہت ئس پد چہیانٹ و پراد نا تُرندو توار ئس خلق ئٹی تالان مس۔ اینو دژمن خلق ئنا ہر نرینہ ئے سُم تا گواچی کننگ اسک۔ بیرہ نرینہ ہم اخہ اینو دژمن تینا گواچن آ دروشم ئٹ بسس و ہچو گِڑا ئسے آ تڑس کُنتئوّکہ۔ ساہت اندا اس کہ کنا خن تا مونا کنا پیر انگا باوہ تینا پاٹی آ کٹ ئنا زی آ دتر ئٹ اسِٹ اس۔ دژمن ایلو پارہ غا کنا گڑدلو آ ایڑ ئے تینا پلیت انگا دو تیٹی گِر کننک اس و کنا لمہ چیہانٹ و پراد ئتون اوار خدا غان دعا خواہنگ اس کہ اے خدا! دا بے بن و بے پڑدہ غا دژمن ئے نی نیست و غرک کر۔۔۔
دا بیرہ کنا خلق ئنا داستان الوّ، دا ہر ہمو خاہوت نا کسہ اس و اینو کنا خلق بیرہ کربلا آخہ بلکن اوڑان ہم گیشترو ندارہ ئس جوڑ اسک۔
ایلو کنڈ آن کنا ضمیر کن تون جنگ تِننگ اسک۔۔۔ دا بیرہ کنا مثیل الوّ، دا ننا خلق ئنا ہر اسہ بندغ نا کسہ اس، ہرافک جنگ آن مُر اسہ بے مسخت ءُ زند ئسیٹی خوش اسر و بیرہ دیگر تون کچاری، مخنگ و شُغل ئٹ آختہ اسر۔ تینا جند ئنا زند ئے جوانی ئٹ تدیفنگ نا سوچ آتا گڑگیس ئٹ بندی و خیال آک تا قیذ اسر و مدام اندا فکر ئٹی اسر کہ دژمن نا دوتا شیف آن مرین و اونا غلام مرین مچٹو زرّ ئسے کن نوکری کین، برام و چُنائی مرین۔۔۔
ای داسہ چٹ بھاز ہیت و گپ کننگ مروٹ کنا لوزاک و ہیتاک اسِٹ ایلوڑ تون اوار مفرور و کنا خڑینکی خنک، مُرغُنا آڑسندہ غاک و مُونجا غا دروشم نے فریشان کرو و ابکہ مرِسہ کنا پام ئے اسہ پین دروشُم ئس تننگ کن نی تینا ہمو زیبا غا ادا ئٹ اُست کش ءُ مہر ئسیٹ پاروس او کنا مہروان! کنا اسہ پین و گُڈیکو خواست ئس ارے، نا دا خواست کنا پام ئ اسہ نیمہ غا پرّیفنگ کن مرو و مہر ئٹ پاروس کہ مہروان! ای اینو دا آجو آ چِرک ئٹ مَش ئنا ٹُل آ رقص ئس کننگ خواہوہ۔۔۔؟
انت نا دا رقص صورِ اسرافیل نا ہمو زمبارہ غان کم مرو، ہرا جہان نا ہر گِڑا ئے خُوڑت خُوڑت و اسِٹ کیک؟ انت نا دا ساہ کش و جغر کش آ، اُچ کمانی و کوہ مارانی آ درشن آک تینا سازندہ غا و دڑد ءُ مہر ئنا اواری آن جوڑ مروکا مابت نا گواچن آ کِسہ غاتا سیم آتِہ دنز تفرور۔۔۔؟ انت نا دا آھو آ خنک کنا جون ئے مثیل ئٹ گروک ئسے نا چِلیک تفرور۔۔۔؟ انت نی تینا ککو و سیسُو دُروشم آ گھام تا تخنگ آن کن کہ زمی جُم بش کپروس۔۔۔؟ انت نی خُزدری آ اُست خواہی و ٹیک و سیبو ئٹ، کنے تینا مِہر ئنا دام ئٹ پلویڑ کپروس۔۔۔؟ انت داڑے نا زیبا انگا ہمو مُرغُن آ و ہنّامی آ پُژہ غاک اینو یلَہ مرور و ہرافک بولانی آ انکل آتا دروشم ئٹ کسس ئے ژند کپرور۔۔۔؟ دا نازُرک انگا دُوک اینو مٙش تِہ خُمب کننگ نا کوشست ئٹ مرور، نا ہمو ہفت رنگی آ دوچ اینو آسمان نا رنگ ئے ہم لجّی و شکی کننگ مرو۔۔۔ انت نا دا دُو تا ناز و نخرہ ئٹ سُرفنگ آ کنا خنک سٹپرور۔۔۔؟ انت رقص آن پد نا لِخ ئنا خید آتِہ، ای زم زم آن زیات ہنین پاپر۔۔۔؟ انت نا ہمو پاک آ خید آتا مونا پنج دیری نا دیر ئے پلیت پاپر۔۔۔؟
کاش کہ مروسُٹ خدا ئس بیرہ زمانہ ٹی مدامی کن و ساندہ اندا ساہت ئے تینا خن تا مون اٙ ایسوٹہ و آجو آ وطن ئٹی نا درشن آتِہ سیل کریٹہ۔۔۔!
اجو کنا خنتا پُدینی، جہان نا ہر ہمو زیبا غا، ہنین انگا ساہت ئے نیتون گدریفوٹ۔۔۔، ولے زامر کنا! کنے بشخس، نی کنے باز دوست اُس، مولہ نا جٙل تا توار آنبار، بولان نا بُڑز انگا و سوگوّ آ ٹُل آتا مثیل ئٹ و سرمچار سنگت آتا سیبو آنبار، کنے بشخِس مُومل ای داسہ اُلاخ ئے سنج کننگ اُٹ، سُم تِہ میگزین ئٹی شاغنگ اُٹ، امیل ئے سینہ غا بیرفنگ ئٹی اُٹ، گولہ و مارٹر آتِہ اُلاخ آ ہمپنگ ئٹی اُٹ، تھرمل نا نشانہ ئے جوڑ کننگ اُٹ، سنائپر نا دوربین ئے صاف کننگ اُٹ و تینا جلی آ بوتل ئے دیر آن پُر کننگ اُٹ، لُمہ ڈغار نا زیبا غا بیرک ئے سینہ غا بیرفنگ اُٹ۔۔۔ نن اسہ بھلو جلہو ئسے کن ہننگ اُن انتئے کہ اینو اسلمی اٙ مہر آتا گہوش باز پُدین چِکنگ ءِ۔۔۔ اگہ آجوئی اسکان زندہ مسوٹ گُڑا نا سوزا غا دروشم ئے الم روب ایتوٹ۔۔۔داسہ جنگ برجا ءِ، ہمو جنگ ہرا کہ آجوئی اسکان برجا مرو۔گر ای جنگ ئٹی شہید مسوٹ گڑا کنا ہمو مومل اٙ ایڑ، ہرا کہ زندان ئٹی داسکان بندی ءِ، اودے اندا پاس کہ نا ہمو گڈی نماز قبول مسک، ہرا نا وخت آ، دژمن نے تینا پلیت اٙ دو تیٹ زندان نا گواچی کرے و کنا زامر کنا ایڑ ئے دا ہم پاس کہ نے آن و باوہ جان آن پد دا پلیت آ دژمن لمہ جان ئے ہم تینا سم تا گواچی کرے۔ گُڈسر ئٹ ہنینا ایڑ ئے پاس اگہ نی خلق آ اِناس گڑا اوغپیس بلکن شاد و گل مریس مٙخس و اندا مخنگ ئٹ اینو تینا ساہ ئے ندر کروکا ایلم کن دشتار نا زیبا انگا لوّیس نا جاگہ غا مُسہ رنگی ءُ کفن ئس موغس کہ او اینو بلوچستان نا اسہ مَش ئسیٹی تینے دا ڈغار کن مہر و مابت ئٹ ندر کرینے و تینا زگر آ دتر ئٹ خیسُنی بشخانے۔ اودے پاس کہ تینا چنگ بروت آ ایلم کن شادکامی نا دئرّہ غاتِہ ساز کیس و مُچا خلق ئنا شانتُل آتِہ بٹنگِس و باگُل آتیٹ لاڈو لڈو پارِسہ کنے صد ناز لاڈ و مہر ئٹ رُخصت کیس۔۔۔ زامُر جان نی الم بریس کنا شادکامی نا دا دے آ اوار مریس، ھُرِس خڑینک شولپیس و کنا شینلو آ ایڑ ئنا ٹیک و سیک مریس، کنا ساہ بیرہ تینا نازُرک آ دُو تیٹ چاپ خلیس و تینا ہنینا توار ئٹ باگُل پاس و ای ایسر ئٹ نُم کن بیرہ پُلھین امیر جان نا دا گپ ئے پاوہ ” رُخصت اف اوار اُن سنگت”۔
زامر! نی کنا دا چِٹی نا ورندی ئے پدا تِفیس، مننگ کیک ای شہید مروٹ۔۔۔ نا چِٹی نا کسس ورندی ئے تفرو۔ سلامت مریس تینا آشوبی آ دروشم تون۔۔۔
چِٹی نا ایسری ئے شاعری نا خدا، اُستاد مرید جان نا شاعری آن دُن کیوہ کہ “زند ئنا دیک ہمو اسر نیتو اے یار اِنار۔۔۔،”
نا “گُلزار” جہہ: مارگٹ نا سنگر وخت: ویگہ نا ساہت گوریچ نا توار تون
