شال پریس کلب نا مون آ زوراکی نا بیگواہی تا برخلاف ‘وائس فار بلوچ مسنگ پرسنز’ نا برانزی گدان ئے اینو 5659 دے مس۔
خضدار آن بروکا سیاسی و چاگڑدی جہدکار محمد علی بلوچ، عبدالرزاق بلوچ، میر بجار مری، طاہر بادینی و سریش بگٹی اواری نا درشانی کریر۔
وی بی ایم پی نا وائس چیئرمین ماما قدیر بلوچ تران کرسہ پارے کہ بندغی حق و زوراکی ئٹ بیگواہ کننگوک آ تیکن توار ہفّنگ آ ہندنو زوراکی کننگک کہ ہرافتا یزیدیت ہم شکّی مرے، پاکستانی ریاست جہانی بندغی حق آتا قانود آتہ پرغنگ ئٹی ءِ و او داڑا مچّٹ ہم ننگی مفک۔
بےمہار پاکستانی ریاست ہر وڑئنا بنیاتی بندغی حق آتہ منّنگ آن تینے جتا کرینے۔
او پارے کہ پنجگور، خاران، قلات و بولان تون اوار نومبر نا بِناء ٹی ڈیرہ بگٹی، ہرنائی و بلوچستان نا ایلو بھاز آ علاقہ تیٹ فوجی لشکرکشی کننگانے۔
ماما قدیر بلوچ پارے کہ ایلو کُنڈ آ ریاستی کارندہ غاک بلوچ مخلوق تون ظلم و تادی کننگ ئٹی ءُ، زور ئنا بیگواہی و جون خسّنگ نا چرجوئی ترندی ئٹ برجاء ءِ۔
