بلوچستان لبریشن فرنٹ نا سربراہ ڈاکٹر اللہ نذر بلوچ جماعت اسلامی و حق دو تحریک نا کڑد آتیا تنقید کرسا بلوچ اُلس ئے اوفتے آن مُر مننگ نا پارینے۔
او دا درشان ئے چاگڑدی سائیٹ بلیو اسکائی آ تینا آفیشل اکاؤنٹ آ شنگ کرے۔
تینا درشان ئٹی ڈاکٹر اللہ نذر سوال کرسا پارے کہ اینو دا حالیت آ تیٹ حق دو تحریک ارادے؟ او بلوچ آتا ہمدرد مننگ نا ڈرامہ کرسا تینا مسخت آتے دوئی کرینے ولے بنگلہ دیش ئٹی اوفتا ہنوکا وخت ئنا کڑد کل ئنا موناٹے۔
او جماعت اسلامی و مولانا ہدایت الرحمان نا حق دو تحریک نا وڑو ایلو مذہبی تنظیم تا کڑد آ تنقید کرسا پارے کہ دا تنظیم آک بلوچ الس ئنا مسئلہ تے حل کننگ نا جاگہ تینا ڈھکوک مسخت تے دوئی کننگ کن کاریم کننگءُ۔
او مُستی پارے کہ ای تینا راج آن خواست کیوہ کہ جماعت اسلامی و ایلو مذہبی انتہا پسند تنظیم تیان مُر مریر۔
یاتی مرے کہ حق دو تحریک بلوچستان نا دریابی شار گوادر آن بش مروکا تحریک نا پِن اسک ہرانا بھلنی ئے جماعت اسلامی بلوچستان نا امیر ہدایت الرحمن کننگ اسک۔
دا تحریک نا سوب آن مولانا ہدایت الرحمان نا شخصیت بلوچستان ئٹ پنی اسک، ہندا سوب آن او تدوکا گچین کاری ئٹ گوادر آن ایم پی اے گچین مسک۔
بلوچ حلقہ تا پاننگءِ کہ مولانا ہرا وعدہ تے الس آن کریسس و ہرا سوب آن پنی مسس داسا مولانا اُلس ئنا امیت تا برعکس پیشتما و ایلو پارلیمانی رہشون تا گام تیا ہنیسہ اُلس ئنا امیت آتیا دیر شاغہ۔
