لوامز یونیورسٹی اوتھل نا خوانندہ غاتا برانز پنچمیکو دے برجاء، خوانندہ بیان دُر بلوچ نا آجوئی نا خواست۔
اوتھل لوامز یونیورسٹی اوتھل ایگریکلچر بشخ ئنا خوانندہ بیان دُر بلوچ نا زوراکی ئٹ بیگواہی نا برخلاف خوانندہ آتا برانز پنچمیکو دے ہم برجاء، برانزیک یونیورسٹی نا مون آ برانز ترسا اینو اسِہ جلوس ئس کریر۔
برانز ئٹی خوانندہ آتون بیگواہ آ بیان دُر نا خاہوت ہم اوار ئس،او تینا چُنا نا آجوئی نا خواست ئے کریر۔
دا وخت کوئٹہ آن سماجی باسک گلزادی بلوچ و زوراکی ئٹ بیگواہ آ راشد حسین نا ایڑ ئنا مسِڑ ماہ زیب بلوچ برانز ٹی بشخ ہلسہ برانزی توں اظہار یکجہتی کریر۔
دا موقع ئٹ خوانندہ غاک یونیورسٹی نا تہٹی برانز و سیمینار ہم کریر۔
برانزی تا پاننگءِ کہ بیان دُر بلوچ نا زوراکی ئٹ بیگواہی نا برخلاف خوانندہ غاک کلاس و امتحان تیان بائیکاٹ کرینو، واہم یونیورسٹی انتظامیہ نا کُنڈان خوانندہ آتے زوراکی ئٹ مڈ ٹرم امتحان آتے تِننگ کن مجبور کننگءُ۔
یاتی مرے کہ اوتھل یونیورسٹی نا خوانندہ بیان دُر بلوچ ئے منِہ دے مُست اوتھل بازار آن ہمراہ تیتون اوار بیگواہ کنگاسس، پدا اونا سنگت آتے آجو کننگا ولے بیان دُر دائسکان ہم بیگواہءِ۔
برانزیک اونا زِند ئنا بابت ئٹ فریشانی نا درشان ترسا خواست کریر کہ اودے زوت آجو کننگ مرے یا عدالت ئٹ ہتنگ مرے اگہ نا نن تینا برانز ئے برجاء تخون۔
