برطانوی نشریاتی ادارہ برٹش براڈ کاسٹنگ کارپوریشن (بی بی سی) نا دا سال تیوعہ جہان نا 100 متاثر کن و با اثر زالبول تا فہرست شنگ کننگا۔
دا فہرست ئٹ دا سال بلوچستان آن بلوچ یکجہتی کمیٹی نا بھلا، سرگرم سیاسی و بندغی حق آتا باسک ڈاکٹر ماہرنگ ہم اوارء۔
بی بی سی نا سال 2024 اکن تیوعہ جہان نا 100 متاثر کن زالبول تا فہرست ئٹ نوبل امن انعام یافتہ نادیہ مراد، ریپ آن بچینگوکا و بندغی حق تا باسک گیسک پیلیکوٹ، اداکارہ شیرون سٹون،اولمپین ایتھلیٹ ریبیکا اینڈریڈ و ایلیسن فیلکس،گلوکار رے وژوئل آرٹسٹ ٹریسی ایمن، ماحولیاتی رکھ ئنا باسک اڈینیکی اولا ڈوسو و مصنفہ کرسٹینا ریویرا گرزا و ایلوفک اوارءُ۔
بی بی سی تینا 100 متاثر کن و با اثر زالبول تا فہرست ئٹ ڈاکٹر ماہرنگ بلوچ ئے اسہ ڈاکٹر و سیاسی باسک نا حساب ئٹ مونی ہیسنو۔
ماہرنگ بلوچ نا حوالہ ئٹ پاننگانے کہ تیوعہ پاکستان ئٹ مروکا برانز آتیٹ بشخ ہلنگ سد آتا کچ زالبول تیٹ بلوچستان ئٹ زوراکی ئٹ بیگواہی تا برخلاف برانز کروکا ماہرنگ بلوچ ہم تُدے۔
بی بی سی نا رد ئٹ ڈاکٹر ماہ رنگ انصاف نا خواست ہموخت کرے ہراوخت اونا باوہ ئے زوراکی ئٹ 2009 آ سیکیورٹی سروس افسر آک دزگیر کریر و ارا سال آن پد بیدادی نا گواچی مروک آتون اوار خلنگاسسس۔
مُستی پاریر کہ 2023 نا ایسر ئٹ ماہ رنگ بلوچ سد آ زالبول تا بھلنی ٹی دارالحکومت اسلام آباد اسکان 1000 میل نا مارچ کرے تاکہ او تینا خاہوت نا بابت ئٹ حوال ہلنگ کیر۔ سفر نا وخت اودے ارا وار دزگیر کننگا۔
بی بی سی مونی نوشت کرے کہ بلوچستان نا ہندی برانزی تا پاننگءِ کہ اوفتا بںدغ تے پاکستانی لشکر انسداد بغاوت نا کاروائی نا وخت برمتہ کرسا خلکنو۔ اسلام آباد کالخواک دا دوبہ تے رد کیرہ۔
اوفتا پاننگ اسک کہ اوکان پد ڈاکٹر ماہرنگ تینا بندغی حق آتا تنظیم بلوچ یکجہتی کمیٹی نا بینر نا خیر اسہ ظاہرو باسک ئس جوڑ مس۔ بندغی حق آتا میدان ئٹ اونا کاریم تے ظاہر مروکا رہشون تا ٹائم 100 نیکسٹ 2024 نا فہرست ئٹ مننگا۔
بی بی سی تینا 100 متاثر کن و با اثر زالبول تا فہرست ئٹ مُستی نوشت کرے کہ غزہ،لبنان، یوکرین و سوڈان ئٹ تنازعہ و بندغی بحران تے مون تریسہ تیوعہ جہان ئٹ ریکارڈ تعدادِ ئٹ انتخابات آن پد معاشرتی ئٹ پولرائزیشن ہننگ اسکان،زالبول تے مزاحمت کن پوسکنو کسر پٹنگ ئٹ محنت کروئی تمانے۔
شنگ کروک نوٹ ئٹ پاننگانے کہ بی بی سی 100 زالبول تا دا ہیت منک کہ دا سال زالبول تے اخس نسخان ہرفوئی تما و زالبول تے آگاہ کریر ہرا تینا مزاحمت ئٹ بدلی آ زور تسنو انتئیکہ اوفتا ایب کھیب جہان بدل مننگءِ، دا فہرست ماحولیات نا ہنگامی صورتحال نا اثر تے پٹنگ کن پرعزم ءُو ماحولیاتی رکھ اکن دُن انگا رہشون تے آگاہ کیک ہرا تینا برادری ئے اونا اثر تیان رکھکنگ و اونا رد ئٹ بدل مننگ کن کمک کننگءُ۔
