بلوچ اسٹوڈنٹس ایکشن کمیٹی نا پارہ غان تربت ئٹ اڈ تروک اِرا دیئی صباء دشتیاری لٹریری فیسٹیول ایسر مسُنے۔
ارا دے اسکان برجاء فیسٹول نا ارٹمیکو دے بساک نا مسکوہی چیئرمین ڈاکٹر صبیحہ بلوچ، چیئرمین شبیر بلوچ و ایلوفک تران کریر، صحافت نا سرحال آ صحافی کیا بلوچ ہم ویڈیو لنک نا زریعت ئٹ تران کرے۔
پروگرام نا ارٹمیکو دے جدیدیت و بلوچی ادب نا سرحال آ پینل ڈسکشن ہم اڈ تننگا، ہراٹی ورنا نوشت کار راشد حسرت، سالم مجید، رضوان فاخر و ایلوفک تینا خیال آتا درشانی کریر۔
پروگرام ئٹ بلوچی بولی نا پِنی آ فلم جوڑ کروک احسان دانش المعروف ماسی دلیان گروپ جوانی ئٹ پرفارم کریر۔
فیسٹیول ئٹ مشاعرہ و میوزیکل نا بشخ ہم اسک ہرانگا بلوچی بولی نا پِنی آ شاعرک تینا کلام تِہ پیش کریر، میوزیکل بشخ ئٹ پِنی آ کلاسیکل شعر پاروک شاکر زامرانی، بلوچی و براہوئی شعر پاروک عبدالخالق فرہاد، وہاب بلوچ، نوشین قمبرانی و ایلوفک گچین فن ئنا درشانی کریر۔
پروگرام ئٹ ورنا تیان بیدس جتا تعلیمی ادارہ غا تا خوانندہ غاک و جتا طبقہ فکر تیان تعلقداری تخوکا بندغ آک بھلو کچ ئسیٹ اوار مسُر۔
